REGİONLAR


Tovuzda özünüməşğulluq proqramı çərçivəsində aktivlərlə təminat prosesi davam edir VİDEO

Tovuz, 15 yanvar, Ruslan Novruzoğlu, AZƏRTAC

Özünüməşğulluq proqramı çərçivəsində Dövlət Məşğulluq Agentliyinin 22 saylı ərazi məşğulluq filialının Tovuz rayon Xidmət Şöbəsi tərəfindən verilən aktivlər üzrə 41 zərf mövcuddur ki, onlardan 4 zərf kənd təsərrüfatı, 37 zərf isə istehsal və xidmət sahəsinə aiddir. Ötən ildə 236 vətəndaş aktivlərlə təmin olunub. Onlardan 58 nəfəri şəhid ailəsi, 75 nəfəri qazi, 20 nəfəri müharibə iştirakçısı və 12 nəfəri əlilliyi olan şəxs, 71 nəfəri isə xüsusi xidməti olmayan adi vətəndaşdır. Filiala 2021-ci ildə 6450 nəfər işaxtaran və işsiz vətəndaş müraciət edib. Onlardan 5418 nəfəri işaxtaran vətəndaş kimi qeydiyyata alınıb, 1250 nəfərə işə göndəriş verilib, onlardan 977 nəfəri daimi işlə təmin olunub.

Azərbaycan Respublikası Prezidenti İlham Əliyevin sosial təşəbbüsü əsasında əhalinin məşğulluğunun təmin edilməsi məqsədilə Əmək və Əhalinin Sosial Müdafiəsi Nazirliyinin tabeliyində Dayanıqlı və Operativ Sosial Təminat Agentliyi nəzdində “DOST İş Mərkəzi” Məhdud Məsuliyyətli Cəmiyyəti yaradılıb. Filial tərəfindən 2021-ci ildə 365 nəfər işsiz vətəndaş “DOST İş Mərkəzi” MMC-də haqqıödənilən ictimai işlərə cəlb olunub. Filial tərəfindən 41 nəfər işsiz vətəndaşa işsizlikdən sığorta ödənişi təyin olunub. Onlardan 5 nəfəri təkrar müraciət edən işsiz vətəndaşdır.

AZƏRTAC xəbər verir ki, Tovuz rayonu aqrar zona olduğundan özünüməşğulluq proqramı çərçivəsində təqdim edilən aktivlərdən kənd təsərrüfatını da əhatə edənləri var. Ermənistanla sərhəddə yerləşən Yuxarı Öysüzlü kəndində yaşayan Novruz Hacıyev də özünüməşğulluq proqramı çərçivəsində aktivlərdən yararlananlardandır. Ona təsərrüfatını inkişaf etdirmək üçün iribuynuzlu mal-qara verilib. Deyir ki, bu proqramdan yararlanmaqla ailəsinin ehtiyaclarını ödəyir. “Məşğulluğa müraciət etdim. Mənə üç baş iribuynuzlu mal-qara verdilər. Özüm də bir neçə dəfə təlimlərdə iştirak etmişəm. Təlimdən sonra mənə inəklər verdilər. Hazırda heyvandarlıqla məşğul oluram. İnəklərdən ikisi də bu yaxınlara bala verəcək”, - deyə N.Hacıyev bildirib.

Özünüməşğulluq proqramından yararlanmaq məqsədilə təkcə heyvandarlıq sahəsi üzrə deyil, eyni zamanda, digər istiqamətlər üzrə də müraciət edənlər var. Qeyd edək ki, özünüməşğulluq proqramı çərçivəsində verilən aktivlər üzrə mövcud zərflərdən bölgələrdə işsiz vətəndaşlar yararlanır. Bu layihə işsiz vətəndaşların özünüməşğulluq proqramından istifadəsinə hesablanıb.

İaşə obyektlərində çalışanlardan da özünüməşğulluq proqramından yararlananlar var. Onlardan biri də Niyaməddin Musayevdir. Aktivlərlə təmin edilən Niyaməddin bərbər işləyir: “Dövlət Məşğulluq İdarəsinə müraciət etmişəm. Bütün avadanlıqlarımı veriblər. Bu layihədən məmnunam”.

Özünüməşğulluq proqramı əsasında bölgələrdə aktivlərlə təminat prosesi davam etməkdədir. Proqrama qoşulanlar əvvəlcə təlimlərə cəlb olunurlar. Burada onlara kiçik biznesin təşkili və idarə olunması öyrədilir. Daha sonra təlimi uğurla başa vuran şəxslərə aktivlər təqdim olunur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.