REGİONLAR
Tovuzlu gənclər hərbi xidmətə yollanıblar
Tovuz, 13 iyul, Famil Quliyev, AZƏRTAC
İyulun 13-də Tovuz rayonunda gənclərin növbəti dəstəsinin hərbi xidmətə yola salınması mərasimi təşkil olunub.
AZƏRTAC xəbər verir ki, hərbi xidmətə yola düşən gənclər və Səfərbərlik və Hərbi Xidmətə Çağırış üzrə Dövlət Xidmətinin Tovuz rayon şöbəsinin əməkdaşları əvvəlcə Ulu Öndərin abidəsi önünə tər çiçək dəstələri qoyaraq, xatirəsini ehtiramla yad ediblər.
Sonra mərasimdə çıxış edən Səfərbərlik və Hərbi Xidmətə Çağırış üzrə Dövlət Xidmətinin Tovuz rayon şöbəsinin rəisi, mayor Elməddin Cəfərov ölkəmizdə ordu quruculuğu sahəsində qazanılmış uğurlardan söhbət açıb, hərbi xidmətə yola düşən gənclərə tövsiyə və tapşırıqlarını verib. Qeyd olunub ki, Milli Ordumuzun maddi-texniki bazasının gücləndirilməsi istiqamətində məqsədyönlü tədbirlər həyata keçirilir. Bunun nəticəsidir ki, Azərbaycan Silahlı Qüvvələri dövlət müstəqilliyimizi və ərazi bütövlüyümüzü qorumağa qadir bir qüvvəyə çevrilib.
Diqqətə çatdırılıb ki, müstəqil Azərbaycan Ordusu hər an torpaqlarımızı yağı düşmən tapdağından azad etməyə hazırdır.
Mərasimdə çıxış edənlər hərbi xidmətə yola düşən gənclərə uğurlar arzulayıb, Vətən qarşısında müqəddəs borclarını şərəflə yerinə yetirməyi, düşmən tapdağı altında olan torpaqlarımızı azad etmək üçün hərbi sirlərə mükəmməl yiyələnməyi tövsiyə ediblər.
Çağırışçı gənclər də öz növbələrində hərbi sirlərə mükəmməl yiyələnəcəklərini və torpaqlarımızın işğaldan azad olunmasına hər an hazır olduqlarını bildiriblər.
Tədbirin sonunda çağırışçılar Azərbaycan bayrağının və müqəddəs Qurani-Kərimin altından keçərək hərbi hissələrə yola düşüblər.