CƏMİYYƏT


Transfertin DSMF gəlirlərində nisbi payının bu il 2017-ci illə müqayisədə 13 faiz azalaraq 25 faiz olacağı gözlənilir

Bakı, 6 avqust, AZƏRTAC

Bu ilin 6 ayında Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fonduna (DSMF) pensiyaların maliyyələşdirilməsi ilə bağlı dövlət öhdəliklərinin icrası üçün transfertin (dövlət büdcəsindən ayrılan vəsaitin) həcmi 903 milyon manat müəyyən olunsa da, həmin vəsaitin 848 milyon manatı istifadə edilib.

Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, beləliklə, yanvar-iyun aylarında fondun xərcləri 24 faiz və ya 453 milyon manat artsa da, transfertin həcmi proqnozdan 55 milyon manat və ya 6 faiz az olub.

Ümumilikdə son illərdə sosial müdafiə sahəsində xərclərin optimallaşdırılması, effektiv idarə olunması, şəffaflığın təmin edilməsi və əsassız xərclərin qarşısının alınması nəticəsində ciddi maliyyə qənaətlərinin əldə olunması fondun transfert asılılığının əhəmiyyətli dərəcədə azalmasına imkan yaradıb.

Dövlət büdcəsindən ayrılan vəsaitin fondun gəlirlərində nisbi payının 2020-ci ildə 2017-ci illə müqayisədə 13 faiz azalaraq 25 faiz təşkil edəcəyi proqnozlaşdırılır. Bu da fondun dövlət büdcəsindən asılılığının azalması və maliyyə dayanıqlığının möhkəmlənməsinin əsas göstəricisidir.

Qeyd edək ki, pensiyaların təyinatının elektronlaşdırılması, saxta və əsassız pensiya işlərinin ləğvi, inzibati nəzarət tədbirlərinin gücləndirilməsi və şəffaflığın təmin edilməsi pensiyalarının nominal xərcləri üzrə 2018-ci ildə 26 milyon manat, 2019-cu ildə 104 milyon manat, 2020-ci ilin ilk altı ayında 55 milyon manat vəsaitə qənaət edilməsinə imkan verib. İndeksasiya göstəriciləri tətbiq edildikdə son 2 ildə pensiya xərcləri üzrə qənaətin həcmi ümumilikdə 238 milyon manat təşkil edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.