Bakı, 5 noyabr, AZƏRTAC

Azərbaycan Turizm və Menecment Universitetində (ATMU) 44 günlük Vətən müharibəsində qazandığımız şanlı Qələbənin ikinci ildönümünə həsr olunmuş “8 Noyabr- şanlı Zəfər tariximiz” adlı tədbir keçirilib. Tədbirdə Azərbaycan Respublikasının Dövlət Himni səsləndirilib, şəhidlərin əziz xatirəsi bir dəqiqəlik sükutla yad edilib.

Bu barədə AZƏRTAC-a ATMU-dan məlumat verilib. Bildirilib ki, tədbirdə çıxış edən ATMU-nun rektoru İlham Mədətov və Dövlət Turizm Agentliyinin sədr müavini Azadə Hüseynova 44 günlük Vətən müharibəsində qazandığımız şanlı Qələbənin əhəmiyyətindən, Azərbaycan Ordusunun qəhrəmanlığından söz açıblar. Qeyd edilib ki, bu tarixi Qələbə dövlətimizin rəhbərinin siyasətini, qətiyyətini nümayiş etdirməklə həm də çətin gündə xalqımızın birliyini ortaya qoydu, müzəffər Ordumuzun Azərbaycanın hərb tarixinə şanlı səhifə yazmaq bacarığına malik olduğunu sübuta yetirdi. Azərbaycan Prezidenti dəfələrlə xatırlatmışdır ki, bizim heç kimin torpağında gözümüz yoxdur. Biz tarixi ədaləti bərpa edirik. Azərbaycan əsgəri və zabiti torpaqlarımızın azad olunması uğrunda döyüşür.

Vurğulanıb ki, Müzəffər Ali Baş Komandan, Prezident İlham Əliyevin rəhbərliyi ilə qazanılan şanlı Qələbə dövlətçilik tariximizdə xüsusi əhəmiyyət kəsb edir. Məhz Prezidentin rəhbərliyi, rəşadətli Azərbaycan Ordusunun yenilməzliyi, şücaəti sayəsində torpaqlarımız düşmən işğalından azad olundu, 30 illik yurd həsrətinə son qoyuldu.

ATMU-nun Turizm biznesi kafedrasının dosenti Tərlan Növrəsli, şəhid Məhəmmədəli Həsənzadənin valideynləri, eyni zamanda, Vətən uğrunda döyüşlərdə şəhid və qazi olan igid övladlarımızın şücaəti və yenilməzliyi qarşısında sonsuz ehtiramını müəllifi olduğu “Qarabağıma gəl” şeiri ilə ifadə etdi.

Daha sonra müharibə iştirakçısı olmuş məzunlara diplomlar və universitet adından hədiyyələr təqdim olunub. Müharibə iştirakçısı olan məzun və tələbələr auditoriyalarda 44 günlük Vətən müharibəsi ilə bağlı təəssüratlarını universitet tələbələri ilə bölüşüblər.

Zəfər Gününə həsr olunmuş tədbirdə şəhid ailələri, qazilər, Vətən müharibəsi iştirakçıları, Dövlət Turizm Agentliyinin nümayəndələri və ATMU-nun professor-müəllim heyəti iştirak ediblər.