CƏMİYYƏT
“Türk Dünyası” adlı ilk rəqəmsal layihə təqdim olunub VİDEO
Bakı, 25 may, AZƏRTAC
Mayın 25-də Trend İnformasiya Agentliyi və Türkiyənin “Albayrak Media Group”un birgə yaratdığı “TURKİC.World” (Türk Dünyası) adlı ilk rəqəmsal layihənin təqdimatı olub.
AZƏRTAC xəbər verib ki, təqdimatda çıxış edən Trend İnformasiya Agentliyinin nümayəndəsi Sahil Kərimli bu il fevralın 18-də Prezident İlham Əliyevin “Azərbaycan Respublikası ilə Türkiyə Respublikası arasında media sahəsində strateji əməkdaşlıq haqqında” Anlaşma Memorandumunu təsdiqlədiyini qeyd edib. O bildirib: “Memorandumun hazırlanması üçün Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevin rəhbərliyi ilə nümayəndə heyəti Türkiyəyə səfər edib. Səfərin əsas məqsədi Azərbaycanla Türkiyə arasında birgə media platforması yaratmaq, o cümlədən hər iki ölkənin sosial media vasitəsilə dünyada daha yaxından tanıdılması olub. Səfər çərçivəsində Türkiyə Prezident Administrasiyasının İctimaiyyətlə Əlaqələr İdarəsinin rəhbəri Fəxrəddin Altun, bir sıra dövlət və media qurumlarının rəhbər şəxsləri ilə görüşlər keçirilib, ortaq media platformasının qurulması yolları müzakirə olunub. Eyni zamanda, aprelin 10-da Bakıda Türkdilli Dövlətlərin Əməkdaşlıq Şurasının (Türk Şurası) informasiya və media üzrə məsul nazirlərinin, yüksək vəzifəli rəsmilərinin üçüncü toplantısında türkdilli dövlətlər arasında əlaqələrin inkişaf etdirilməsi istiqamətində lazımi işlərin görüldüyü bildirilib. Həmçinin ölkəmizin türkdilli dövlətlərlə əməkdaşlığın inkişafı məqsədilə yol xəritəsi hazırladığı qeyd olunub. Bununla yanaşı, tədbir zamanı İnformasiya və kommunikasiya sahəsində əməkdaşlığın genişləndirilməsinin qarşıda duran prioritet istiqamətlərdən biri olduğu vurğulanıb. Diqqətə çatdırılıb ki, türkdilli ölkələr arasında əlaqələrin dərinləşməsi həm Prezident İlham Əliyevin, həm Türkiyə Prezidenti Rəcəb Tayyib Ərdoğanın, həm də digər türkdilli ölkələrin rəhbərlərinin diqqət mərkəzindədir. Bu qardaş ölkələr arasında həyatın bir çox sahələrində münasibətlərin daha da inkişaf etdirilməsi üçün ortaq media platformasının yaradılması xüsusi əhəmiyyət daşıyır. Qeyd olunanları nəzərə alaraq, türkdilli ölkələr arasında ortaq media platformasının yaradılması ideyasına öz töhfəmizi vermək qərarına gəldik. Bu məqsədlə bu gün Trend İnformasiya Agentliyi Türkiyənin “Albayrak Media Group”u ilə birgə yaradılan TURKİC.World (Türk Dünyası) adlı ilk rəqəmsal layihəni (https://turkic.world) təqdim edir”.
S.Kərimli qeyd edib ki, ilk dəfə həyata keçirilən layihənin məqsədi türkdilli ölkələrin ortaq tarixi, dini, mədəni və dil dəyərlərini əsas götürərək, türk dünyasının ortaq kommunikasiya platformasını yaratmaq və kontenti birbaşa informasiya mənbəyinə çevirməkdir. Nadir proqram təminatı layihənin daha da təkmilləşməsinə və yaradılan rəqəmsal platformaya digər türkdilli ölkələrin də media qurumlarının qoşulmasına imkan verir.
Qeyd olunub ki, rəqəmsal platformanın mobil versiyası da mövcuddur. Mobil versiya gələcəkdə bütün platformanın inkişafının və təkmilləşməsinin əsasını təşkil edəcək. Eyni zamanda, nadir proqram təminatı sayəsində gələcəkdə türkdilli ölkələrin media qurumları öz ölkələri ilə bağlı xəbərləri rus, ingilis və digər dillərdə sayta yerləşdirə biləcəklər.
Medianın İnkişafı Agentliyinin icraçı direktoru Əhməd İsmayılov bildirib ki, Türkiyə və Azərbaycan dünya miqyasında bir-birinə yaxın müttəfiqlərdir. Ölkələrimiz bütün məsələlərdə bir yerdədirlər. Bu gün dünyada Azərbaycan və Türkiyə qədər bir-birinə yaxın olan dövlətlər yoxdur. Çünki bizi birləşdirən qədim tariximiz var. Biz bir kökün, bir soyun daşıyıcılarıyıq.
İcraçı direktor vurğulayıb: “44 günlük Vətən müharibəsində Azərbaycana Türkiyə qədər dəstək olan ikinci ölkə olmayıb. Media nümayəndələri, qardaş ölkənin jurnalistləri dayanmadan döyüş bölgələrindən reportajlar hazırlamaqla haqq səsimizi dünyaya çatdırdılar. Bu həmrəylik bizi daha da ruhlandırdı və bizə əlavə güc verdi. Hərbi, siyasi, iqtisadi, mədəni, təhsil, ticarət sahələrində olduğu kimi, media əlaqələrimizin də daha dərindən və əhatəli inkişafı prioritet hədəfimizdir. Burada ən əsas amil birgə atacağımız addımlardır. Ölkələrimizin rəhbərlərinin verdikləri qərarlarla ötən ilin sentyabrında Azərbaycan Prezidentinin köməkçisi Hikmət Hacıyevin rəhbərlik etdiyi və bizim də tərkibinə daxil olduğumuz nümayəndə heyəti qardaş ölkə mediası ilə birgə media platforması yaratmaq, hər bir ölkənin sosial mediası vasitəsilə dünyaya daha yaxından tanıdılması məqsədilə İstanbula səfər edib. Səfər çərçivəsində ölkələrimiz arasında ortaq media platforması yaradılması ilə bağlı qərar qəbul edildi. Cəmi bir neçə ay sonra isə Azərbaycanla Türkiyə arasında media sahəsində strateji əməkdaşlıq haqqında memorandumun qəbul edilməsi haqqında qanun layihəsi təsdiqləndi. Bununla da Azərbaycanla Türkiyə arasında birgə media platformasının yaradılması təsdiq edildi.
“Albayrak Media Group”unun rəhbəri Ömər Karaca deyib ki, bu gün bizim güclü mediaya ehtiyacımız var. O qeyd edib ki, bizim bu iş birliyimizin güclü Azərbaycan və güclü Türkiyə üçün önəmli olacağını düşünürəm. “TURKİC.World” media platforması türk dünyasının həqiqətlərinin dünya ictimaiyyətinə çatdırılmasında önəmli vasitə olacaq. Azərbaycan 44 günlük Vətən müharibəsi ilə öz torpaqlarını ermənilərdən geri aldı: “Biz də öz media qurumlarımız vasitəsilə Azərbaycanın Qələbəsini və haqlı mövqeyini dünya ictimaiyyətinə çatdırdıq, dünyanın dörd bir tərəfində bu məsələni gündəmdə saxladıq”, - deyə o qeyd edib.
Milli Məclisin deputatı Sevil Mikayılova bildirib ki, Azərbaycan-Türkiyə qardaşlığının özəyini təşkil edən böyük türk birliyi yeni mərhələyə qədəm qoymaqdadır. Xalqlarımızın və dövlətlərimizin arasında münasibətlər dinamik inkişaf edir, strateji tərəfdaşlığımız durmadan güclənir. Böyük coğrafi məkanda yerləşən Azərbaycan, Türkiyə, Qazaxıstan, Qırğızıstan, Özbəkistan və Türkmənistan kimi dövlətlər öz ortaq tarixi, mədəni, dini dəyərlərinə əsaslanaraq uğurla əməkdaşlıq edirlər. Qırx dörd günlük müharibə dövründə qardaş Türkiyənin Azərbaycanın yanında olması, qardaş ölkədən aldığımız siyasi və mənəvi dəstək Azərbaycan xalqının qəlbində əbədi yaşayacaq. Türkiyənin bütün sahələrdə Azərbaycana göstərdiyi dəstək media sahəsində də müşahidə olundu.
Türkiyənin Azərbaycandakı səfiri Cahit Bağçı qeyd edib ki, haqq səsimizin dünyaya çatdırılmasında media böyük önəmə sahibdir. Qarabağda gedən müharibə zamanı həqiqətlərin dünyaya çatdırılmasında media mühüm rol oynadı. Türkiyə ilə Azərbaycan arasında inanılmaz qardaşlıq var. Qarabağ Zəfərində Türkiyə ilə Azərbaycan arasında qardaşlıq, “Bir millət, iki dövlət” kəlamı özünü daha qabarıq büruzə verdi. Biz bu qardaşlığı, bu münasibətləri bundan sonra inkişaf etdirməliyik və media burada ən önəmli vasitədir.
Digər çıxış edənlər Azərbaycan həqiqətlərinin dünyaya çatdırılmasında Türkiyə mediasının böyük rolundan, türk dünyasının media gücünün artırılmasında bu gün istifadəyə verilən vahid platformanın əhəmiyyətindən bəhs ediblər.