DÜNYA
Türk Şurası: Türkiyədə keçirilən səsvermədə günorta saatlarına qədər heç bir qanun pozuntusu müşahidə olunmayıb
İstanbul, 24 iyun, AZƏRTAC
Türkdilli Dövlətlərin Əməkdaşlıq Şurası (Türk Şurası) Türkiyədə keçirilən növbədənkənar prezident və 27-ci çağırış parlament seçkilərini geniş tərkibli heyətlə müşahidə edir.
AZƏRTAC xəbər verir ki, Türk Şurası beynəlxalq müşahidə missiyası ilə Antalya, İstanbul və Samsun şəhərlərində səsvermə prosesini izləməkdədir. Müşahidə missiyasına Türk Şurası və Türk Akademiyasının katibliyinin əməkdaşları, o cümlədən Azərbaycan, Qazaxıstan və Qırğızıstandan olan rəsmi heyətlər daxildir.
Səsvermənin azad və demokratik şəkildə davam etdiyini bildirən Türk Şurasının baş katibi Ramil Həsən AZƏRTAC-ın xüsusi müxbirinə açıqlamasında bildirib ki, missiya günorta saatlarına qədər səsvermə prosesində heç bir qanun pozuntusu aşkar etməyib. Missiya səsvermənin yekunları ilə bağlı bəyanatla çıxış edəcək.
Sabir Şahtaxtı
AZƏRTAC-ın xüsusi müxbiri
İstanbul