SİYASƏT


Türk Şurasının baş katibi Müstəqillik Günü münasibətilə Azərbaycan xalqını təbrik edib

İstanbul, 18 oktyabr, AZƏRTAC

Türk Şurasına sədrlik edən və qurucu üzv dövlətimiz olan Azərbaycan Respublikasının Müstəqillik Gününü təbrik edirik. Bu münasibətlə qardaş Azərbaycan xalqına və hökumətinə ürəkdən təbriklərimi çatdırmaqdan şərəf duyuram.

AZƏRTAC xəbər verir ki, bu fikirlər Türkdilli Dövlətlərin Əməkdaşlıq Şurasının (Türk Şurası) baş katibi Bağdad Amreyevin 18 oktyabr - Müstəqillik Günü münasibətilə Azərbaycan xalqına və dövlətinə ünvanladığı təbrik məktubunda yer alıb.

Məktubda deyilir: “Azərbaycan Respublikasının Ali Soveti tərəfindən 1991-ci il oktyabrın 18-də qəbul edilən, 1918-1920-ci illər arasında mövcud olan Azərbaycan Xalq Cümhuriyyətinin varisi olaraq Azərbaycan Respublikasının müstəqilliyini bütün dünyaya elan edən “Dövlət müstəqilliyi haqqında” Konstitusiya Aktı qardaş Azərbaycan xalqının taleyində böyük tarixi əhəmiyyətə malikdir”.

Həmçinin məktubda Prezident İlham Əliyevin müdrik rəhbərliyi ilə bölgədə sabitliyin və sülhün rəmzinə çevrilən Azərbaycanın siyasi, iqtisadi və sosial sahələrdə qazandığı böyük uğurlardan məmnunluqla bəhs olunub. Vurğulanıb ki, Azərbaycan Respublikası Türk Şurasında da əhəmiyyətli rol oynayır. Türk Şurasının təsis sənədi Naxçıvanda imzalanıb, təşkilatımızın quruluşunun 10-cu ildönümü ərəfəsində keçirilən Türk Şurasının 7-ci Zirvə görüşünə Azərbaycan uğurla ev sahibliyi edib. Həmçinin COVID-19 pandemiyasına qarşı tədbirləri müzakirə etmək məqsədilə Türk Şurasının fövqəladə Zirvə görüşü də məhz Azərbaycanın təşəbbüsü ilə keçirilib.

“Azərbaycan tarixinin bu vacib dövründə qardaş Azərbaycan xalqının yanında olduğumuzu bir daha ifadə edir, Azərbaycan Respublikasının beynəlxalq səviyyədə tanınan ərazi bütünlüyünü bərpa etmək üçün beynəlxalq hüquq çərçivəsində yürütdüyü haqlı mübarizəsinə güclü dəstəyimizi bir daha ifadə edirik.

Qardaş Azərbaycanın şanlı bayrağının azad edilmiş əzəli torpaqlarında dalğalanacağına olan inancımı ifadə edərək, bu əlamətdar gün münasibətilə bir daha səmimi təbriklərimi çatdırır, Azərbaycan xalqına sülh, əmin-amanlıq və rifah dolu gələcək arzulayıram.

Müstəqillik Gününüz mübarək olsun!”, - deyə təbrik məktubunda bildirilib.

Günel Məlikova

AZƏRTAC-ın xüsusi müxbiri

İstanbul

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.