CƏMİYYƏT
Türkiyə-Azərbaycan dostluğunun daha bir nümunəsi
Bakı, 17 may, AZƏRTAC
Azərbaycan Respublikasının Prezidenti İlham Əliyevin Türkiyənin Rize-Artvin Hava Limanında açılış mərasimində iştirak etməsi Türkiyə-Azərbaycan dostluğunun sarsılmaz olduğunu bir daha təsdiqlədi. Həmin gün beynəlxalq ictimaiyyət həm iki qardaş ölkə arasındakı münasibətlərin yüksək səviyyədə olmasına, həm də dünyada sayca beşinci olan nəhəng hava limanının açılışına şahidlik edirdi. Bu hava limanının açılış mərasimi ona görə böyük maraqla izlənilirdi ki, nəhəng aeroport dənizi doldurularaq inşa edilmişdi. Həm də nəzərə almaq lazımdır ki, Rize-Artvin bölgəsi Anadolu ərazisində ən mürəkkəb coğrafi relyefə malikdir. Buna baxmayaraq, qardaş ölkənin güclü iqtisadiyyatı və ölkədə həyata keçirilən regionların inkişafı və mövcud potensialdan daha səmərəli istifadə edilməsi strategiyası bu nəhəng hava limanının da inşasına imkan yaradıb.
Bu fikirləri AZƏRTAC-a Azərbaycan Dillər Universitetinin doktorantı Ağanisə Yaşarqızı söyləyib.
Doktorant Prezident İlham Əliyevin hava limanının açılış mərasimində böyük coşqu ilə qarşılanmasını iki dövlət arasındakı münasibətlərin yüksələn xətt üzrə inkişaf etməsinin göstəricisi olduğunu bildirib. Qeyd edib ki, həm Türkiyə, həm də Azərbaycan müstəqil və öz qərarlarını özləri verən, siyasi və iqtisadi baxımdan güclü dövlətlərdir. Qürur hissi ilə deyə bilərik ki, bu gün iki ölkənin rəhbərliyi xalqın arzularını dövlətin siyasəti səviyyəsində həyata keçirməkdədir. Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın iradəsi sayəsində ikitərəfli münasibətlərimiz getdikcə inkişaf edərək yüksək müttəfiqlik səviyyəsinə çatıb. Məhz Liderlərimizin sayəsində Türkiyə-Azərbaycan dostluq və qardaşlığı dünya miqyasında da yüksək qiymətləndirilir. Dövlətimizin başçısı hava limanının açılış mərasimindəki çıxışında da bu məsələni xüsusi vurğuladı.
A.Yaşarqızı belə mürəkkəb və nəhəng hava limanının açılışının Türkiyədə gedən çox uğurlu inkişafın təzahürü olduğunu bildirib. Deyib ki, dövlətimizin başçısı çıxışında bu faktı diqqətə çatdırıb: “Qardaş Türkiyə gündən-günə güclənir, sürətlə inkişaf edir. Bütün bunun təməlində aparılan siyasət, əziz qardaşımın böyük əməyi, zəhməti vardır. Türkiyə bu gün nəinki dünya miqyasında böyük güc mərkəzinə çevrilib, söz sahibi olub, eyni zamanda, ölkə içində də böyük layihələr icra etməyə qadirdir. Bunların arasında xüsusilə, insanlara xidmət göstərən layihələri qeyd etmək istərdim. Hava limanları, su anbarları, yollar, körpülər, məktəblər, xəstəxanalar – bütün bunlar Türkiyənin inkişafını, gücünü göstərən amillərdir və bütün bu işlərin mərkəzində insan amili dayanır, dövlət siyasəti dayanır”.
Doktorant Türkiyə Prezidentinin işğaldan azad edilmiş ərazilərimizdə inşa olunan Füzuli Beynəlxalq Hava Limanının açılış mərasimindəki iştirakını xatırladıb. Vurğulayıb ki, Rəcəb Tayyib Ərdoğan hava limanına eniş edən ilk əcnəbi dövlət başçısı olub. Sonra isə prezidentlər işğaldan azad edilmiş Zəngilan rayonunda aparılan bərpa-quruculuq işləri ilə tanış oldular. İki ölkə arasında imzalanmış müttəfiqlik haqqında Şuşa Bəyannaməsi dostluq və qardaşlığın ən yüksək nöqtəsi oldu. Şuşa Bəyannaməsi həm də dünyaya verilən mühüm mesajdır. Bu sənədi imzalamaqla Türkiyə ilə həm sözdə, həm də əməldə bir olduğumuzu dünyaya bəyan etdik. Bəyannamə, eyni zamanda, qardaş ölkələrimiz arasında əməkdaşlığın mahiyyətini rəsmiləşdirdi. Türkiyə və Azərbaycan onsuz da istənilən şəkildə müttəfiq idi, o cümlədən hərbi və müdafiə sənayesi sahələrində.
Vətən müharibəsi zamanı Türkiyənin sona qədər Azərbaycana arxa, dayaq olduğunu diqqətə çatdıran A. Yaşarqızı deyib ki, Prezident İlham Əliyev də bu məsələni diqqətə çatdıraraq bildirib: “İkinci Qarabağ savaşı bizim müştərək, ortaq şanlı tariximizdir. Otuzillik işğala son qoyduq və savaşın ilk günündə hörmətli Prezident, qardaşım Rəcəb Tayyib Ərdoğanın “Azərbaycan yalnız deyil, Türkiyə Azərbaycanın yanındadır”.
Bütün bunlar bir daha təsdiqləyir ki, Türkiyə-Azərbaycan dostluq və qardaşlığını heç bir qüvvə sarsıda bilməz.