İDMAN


Türkiyə millisinin baş məşqçisi: qardaş Azərbaycanda medal qazandığımız üçün çox sevinirik

Bakı, 27 iyul, AZƏRTAC

Azərbaycanda özümüzü evimizdəki kimi hiss edirik. Ölkəniz bu festivala yüksək səviyyədə ev sahibliyi edir. Qardaş ölkədə üçüncü yer tutduğumuz üçün sevincliyik. Azərbaycanda azarkeşlər bizə hər oyunumuzda dəstək oldular. Bakıda idman arenaları, məşq zallarında yaradılan şəraitdən razıyıq. Qaldığımız Atletlər Kəndi çox gözəldir və bizim üçün hər cür imkan yaradılıb. Bütün bunlara görə təşkilatçılara, azarkeşlərə minnətdarlığımızı bildiririk.

Bunu Türkiyənin voleybol üzrə milli komandasının baş məşqçisi Özkan Gönülaçar AZƏRTAC-a müsahibəsində deyib.

Festival çərçivəsində keçirdikləri oyunlar barədə danışan baş məşqçi qrupda güclü rəqiblərlə mübarizə apardıqlarını bildirərək deyib: "Qrupda iki komanda növbəti mərhələyə yüksələcəkdi. Festivalın ilk günündə Belarusla oyunda məğlub olsaq da, qrupdan çıxacağımıza inamımızı itirməmişdik. Odur ki, festivalın ikinci və üçüncü günlərində İtaliya və Almaniya ilə oyunlarda qələbə qazanmağı bacardıq. Yalnız yarımfinalda güclü Rusiya komandası ilə görüşdə komandamız yaxşı mübarizə aparsa da, təcrübəsizlikdən uduzdu. Azərbaycandan Türkiyəyə medalla qayıtmağı çox istəyirdik. İtaliya kimi güclü komandanı məğlub edərək medal qazana bildiyimiz üçün çox sevinirik".

Xatırladaq ki, iyulun 27-də Türkiyənin voleybolçu qızları üçüncü yer uğrunda görüşdə İtaliya millisinə qalib gələrək bürünc medallara sahib olublar.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.