Türkiyə və Ukrayna prezidentləri arasında telefon danışığı olub

Ankara, 25 mart, AZƏRTAC

Türkiyə Prezidenti Rəcəb Tayyib Ərdoğan ilə Ukrayna Prezidenti Volodimir Zelenski arasında telefon danışığı olub.

AZƏRTAC xəbər verir ki, bu barədə məlumatı Türkiyə Prezidenti Administrasiyasının Kommunikasiya İdarəsi yayıb.

Bildirilib ki, liderlər Ukrayna ətrafında baş verən hadisələri, eləcə də böhranın həlli yolunda danışıqların vəziyyətini müzakirə ediblər.

Qeyd edək ki, Türkiyə Prezidenti Brüsseldə keçirilən NATO samitindən qayıdarkən jurnalistlərə müsahibəsində yaxın günlərdə Vladimir Putinlə də telefonla danışacağını deyib.

Türkiyə tərəfi Ukrayna böhranının sülh yolu ilə və Ukraynanın ərazi bütövlüyü çərçivəsində həlli üçün təxirəsalınmaz vasitəlik missiyası həyata keçirməkdədir.

Sabir Şahtaxtı

AZƏRTAC-ın xüsusi müxbiri

Ankara