CƏMİYYƏT


Türkiyədə keçirilən “Can Azərbaycana bir məktubum var” kampaniyasına şəhid ailələri də qoşulub

İstanbul, 27 noyabr, AZƏRTAC

Türkiyənin Müharibə Qurbanları, Qazilər, Şəhid, Dul və Yetimlər Dərnəyinin Kastamonu vilayətindəki şöbəsinin üzvləri tərəfindən keçirilən “Can Azərbaycana bir məktubum var” kampaniyasına şəhid ailələri də qoşulub.

AZƏRTAC xəbər verir ki, kampaniya çərçivəsində ilk əl yazısı məktub şəhid anası və atası tərəfindən yazılıb.

Bingöldə 2018-ci ildə terrorçuların açdığı atəş nəticəsində şəhid olan əsgər Şevki Eren Yatkının atası Əhməd və anası Zəhra Yatkın kampaniya çərçivəsində Azərbaycana məktub yazmaq istəyiblər.

Kastamonunun Cide rayonunun Çayyaka kəndindən yazdıqları məktubla yola çıxan ailə Kastamonu vilayətinin mərkəzinə gəlib. Ailə məktubu birliyin Kastamonu şöbəsinin sədri Berat Satıoğluna təqdim edib.

Kampaniyanın keçirildiyini eşitdikdə onların da məktub yazmaq istədiklərini bildirən Z.Yatkın deyib: “Can Azərbaycana dəstək vermək üçün yola çıxdıq, 140 kilometr məsafə qət etdik. Azərbaycan öz torpaqlarını geri almaq üçün ayağa qalxıb. Onların əsgərlərinin hamısı bizim övladımızdır. Vətəni, milləti üçün savaşırlar və alnıaçıq torpaqlarını geri alırlar. Allah dövlətimizi, millətimizi qorusun. Türkün türkdən başqa dostu yoxdur. Bunu gözlərimizlə görürük”.

Oğlunu Vətən uğrunda qurban verdiyini bildirən şəhid atası deyib: “Azərbaycandakı qardaşlarımıza mənəvi dəstək olmaq üçün məktub yazmaq istədim. Bir şəhid atası olaraq hisslərim fərqlidir, ürəyimdən gələn sözləri yazdım”.

Kampaniyaya Türkiyənin bir çox yerlərindən dəstək gəldiyini vurğulayan birliyin sədri deyib: “Mail və telefon vasitəsilə gələn məktublardan başqa, əl yazısı ilə ilk məktub Yatkın ailəsindən gəlib. Bütün məktublar bizim üçün qiymətlidir, amma şəhid ailələrimizin yazdığı məktublar daha dəyərlidir. Kastamonunun ən son şəhidlərindən olan Şevki Eren Yatkının ana və atasının kampaniyaya dəstək vermək üçün birliyimizə gəlmələri bizi çox duyğulandırdı. Şəhid ailələri Azərbaycan Ordusunun Vətən, bayraq və azan uğrunda mübarizələrini daha yaxşı anlayan insanlardır. Bu məktublardan kitab hazırlamaq və onu gələcək nəsillərə çatdırmaq niyyətindəyik. Azərbaycanın Xalq artisti Azərinin də dəstək verdiyi kampaniya çərçivəsində məktublar dekabrın 15-dək qəbul ediləcək. Toplanan məktublar Azərbaycanın Türkiyədəki Səfirliyinə təslim ediləcək”.

Günel Məlikova

AZƏRTAC-ın xüsusi müxbiri

İstanbul

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.