Türkiyədə sabahdan güclü tufanın olacağı proqnozlaşdırılır

İstanbul, 28 sentyabr, AZƏRTAC 

Türkiyə meteoroloqları sentyabrın 29-dan etibarən Mərmərə, Egey və Aralıq dənizlərində başlayan güclü fırtınanın sahilyanı vilayətlərdə ciddi təhlükə yaradacağı barədə əhalini xəbərdar ediblər.

Küləyin sürətinin bəzi bölgələrdə 100/120 kilometr/saata qədər yüksələcəyi bildirilir. Xəbərdarlıq edilib ki, ən böyük təhlükə İzmir, Aydın və Manisa bölgələrində gözlənilir. Güclü küləyin evlərin dam örtüyünü, böyük ağacları, elektrik dirəklərini, hətta maşınları aşıra biləcəyi proqnozlaşdırılır. Bununla bağlı yaradılan fövqəladə vəziyyət mərkəzləri ağır texnika, su nasosları, xilasedici maşın və heyətlərlə təmin olunub.

Sabir Şahtaxtı

AZƏRTAC-ın xüsusi müxbiri

İstanbul