DÜNYA


Türkiyədə terror aktı törədilib

İstanbul, 12 sentyabr, AZƏRTAC

Türkiyənin Diyarbəkir şəhərinin Kulp rayonunda terror aktı törədilib. Kəndliləri odun toplamağa aparan maşın PKK terror təşkilatının üzvləri tərəfindən partladılıb.

AZƏRTAC xəbər verir ki, hadisə nəticəsində 4 nəfər həlak olub, 13 nəfər yaralanıb.

Bu barədə Diyarbəkir valiliyindən məlumat verilib. Məlumatda bildirilir ki, Kulp rayonunda odun toplamağa gedən kəndlilərin olduğu maşına PKK-lı terrorçular tərəfindən əllə hazırlanmış partlayıcı vasitə ilə hücum edilib. Hadisə nəticəsində vətəndaşlardan 4-ü həlak olub, 13-ü isə müxtəlif bədən xəsarətləri alıb. Yaralılar Diyarbəkirin müxtəlif xəstəxanalarına yerləşdirilib. Ölkənin mühafizə orqanları tərəfindən lazımi tədbirlər görülür.

Türkiyənin Prezident Administrasiyasının ictimaiyyətlə əlaqələr şöbəsindən verilən məlumata görə, ölkə başçısı Rəcəb Tayyib Ərdoğanın hadisə ilə bağlı Diyarbəkir valisi Hasan Basri Güzeloğlu ilə telefon danışığı olub. Türkiyə Prezidenti terror hadisəsini törədən cinayətkarların saxlanılması istiqamətində bütün imkanların səfərbər ediləcəyini bildirib.

Günel Məlikova

AZƏRTAC-ın xüsusi müxbiri

İstanbul

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.