Ankara, 1 may, AZƏRTAC

Türkiyədə yeni növ koronavirus (COVID-19) infeksiyasının yayılmasında dinamik artımın qarşısını almaq məqsədilə görülən tədbirlər sistemli şəkildə həyata keçirilir. Kütləvi peyvəndləmə və insanların təmasını azaltmaq ən vacib tədbirlər sırasındadır.

AZƏRTAC xəbər verir ki, COVID-19 infeksiyasına qarşı mübarizə tədbirləri çərçivəsində aprelin 29-da yerli vaxtla saat 19:00-da qüvvəyə minən növbəti “Evdə qal!” rejimi tam qapanma şəraitində davam edir. Ölkə üzrə yalnız xüsusi icazəsi olan satış yerləri saat 10.00-dan 17-00-dək çalışır. Strateji əhəmiyyətli istehsal yerlərinin fəaliyyəti xüsusi icazə ilə tənzimlənir. İctimai nəqliyyatın hərəkətində səssizlikdir. Aidiyyəti qurumlar tərəfindən “Evdə qal!” rejimi veb-kameralarla izlənilir. Bundan başqa, təhlükəsizlik qüvvələri, eləcə də polis-patrul xidmətləri vəziyyətə nəzarət edirlər. Mütəxəssislər hesab edirlər ki, 17 günlük “Evdə qal!” rejimi növbəti turizm mövsümü üçün münbit şərait yarada bilər.

Hazırda səhiyyə qurumlarını narahat edən başlıca məsələlərdən biri COVID-19 infeksiyasına yoluxan şəxslərdə infeksiyanın mutasiya versiyasının aşkarlanmasıdır. Məlumatlara görə, bəzi xəstələrdə virusun iki mutasiya variantına rast gəlinib. Hələlik virusun mutasiya variantlarının yayılmasının qarşısını almaq üçün konkret tədbirlər planı yoxdur. Çin istehsallı olan “Sinovac” vaksini ilə peyvəndləmədə isə heç bir ləngimə yoxdur. Səhiyyə nazirinin sözlərinə görə, növbəti mərhələdə qırx yaşdan yuxarı vətəndaşların vaksinləşməsinə başlanılacaq.

Səhiyyə naziri Fahrettin Koca hesab edir ki, 17 gün fasiləsiz davam edərək mayın 17-də saat 05:00-da başa çatacaq “Evdə qal!” rejimi infeksiyanın yayılma tezliyini sürətlə azaldacaq. Lakin hazırda ən çox narahatçılıq doğuran məsələ gündəlik ölüm halındakı statistikadır. Aprelin 30-na olan məlumata görə, son sutkada Türkiyədə 394 nəfər koronavirus infeksiyasından dünyasını dəyişib. Reanimasiyada 2 min 673 nəfərin olduğunu əsas gətirərək ölüm hallarının bir neçə gün yüksək göstəricidə olacağını deyə bilərik.

Qeyd edək ki, Türkiyədə COVID-19 infeksiyasına qarşı mübarizə tədbirləri çərçivəsində aprelin 29-da yerli vaxtla saat 19:00-da qüvvəyə minən növbəti “Evdə qal!” rejimi tam qapanma şəraitində 17 gün fasiləsiz davam edərək mayın 17-də saat 05:00-da başa çatacaq.

Sabir Şahtaxtı

AZƏRTAC-ın xüsusi müxbiri

Ankara