İQTİSADİYYAT


Türkiyənin turizm paytaxtı - Antalya

Bakı, 12 may, AZƏRTAC

Ötən günlərdə “Buta Airways” aviaşirkətinin və “Summer Tour” turoperatorunun dəstəyi ilə bir qrup azərbaycanlı jurnalistin Antalyaya maraqlı və yaddaqalan səfəri təşkil olundu. Səfər çərçivəsində jurnalistlərə Antalya ilə yaxından tanış olmaq, bu səfalı və qədim şəhərin tarixi yerlərini ziyarət etmək, dincəlmək üçün hər cür şərait yaradıldı. Gördüklərimizdən ən yaddaqalan nə oldu? Bunu reportajlarımızdan öyrənəcəksiniz.

Antalya - Türkiyənin cənubunda, Aralıq dənizinin qərb sahillərində, körfəz ilə Toros dağlarının əhatəsində yerləşən məşhur kurort şəhəridir. Antalya Türkiyənin əhalisinin ən sıx olduğu beşinci, sahəsinə görə isə altıncı böyük şəhəridir. Türkiyənin turizm paytaxtı hesab edilən bu şəhər mavi dənizi və gözəl çimərlikləri ilə seçilir.

Yeni və tarixi hissədən ibarət olan şəhərdə Aralıq dənizi iqlimi hakimdir. Ümumiyyətlə, Türkiyənin Aralıq dəniz sahilləri ekoloji baxımdan ən təmiz ərazilər hesab olunur. Antalya şəhəri 1980-ci ildən sonra əlverişli iqliminə görə sürətlə inkişaf etmiş turizm bölgəsinə çevrilib. 1985-ci ildə bu şəhərin maksimum sayda - ildə 2 milyon turist qəbul edib. Hazırda isə hər il Antalyaya Rusiya, Almaniya, İngiltərə, Hollandiya, Azərbaycan və digər ölkələrdən milyonlarla turist gəlir. Antalya ilin 300 günü günəşli olan, yayı isti və quru, qışı mülayim və yağmurlu şəhərdir. Türkiyənin turizm gəlirinin təxminən 35 faizi Antalyanın hesabına ödənilir. Ümumilikdə Türkiyənin ildə ən çox turist çarpayısı satılan şəhəri də 65 faiz göstərici ilə məhz Antalyadır.

Ərazisi 1,4 min kvadratkilometr, əhalisi 2 milyondan çox olan Antalya il ərzində orta hesabla 10-12 milyon turist qəbul edir. Şəhər özünəməxsus arxitekturası, tarixi abidələri ilə də məşhurdur. Türkiyənin ən zəngin muzeylərindən biri məhz Antalyadadır. Burada Osmanlı imperiyasınaqədərki dövrün tapıntıları, romalılara aid heykəllərlə işlənmiş sarkofaqlar nümayiş edilir. Antalya Türkiyədə ən çox antik kənd olan vilayətidir. Özünəməxsus arxitekturası və tarixi abidələri ilə məşhur olan şəhər dağlarla əhatələnib.

“Rixos Sungate” oteli: Antalyada çoxlu saraylar, muzeylər, antik kəndlər və təxminən 400-dək beş ulduzlu otel var. “Rixos Sungate” Beldibində yerləşən, ovsunlayıcı dənizi və çimərliyi ilə hər yay mövsümdə turistlərin axın etdiyi məkandır. Otel xəyallarındakı tətili yaşamaq istəyənlərin Kemerdəki otellər arasından ən unudulmaz əyləncələr təqdim edir. Antalyadakı otelləri arasında keyfiyyətli xidməti və rahatlığı ilə seçilən “Rixos Sungate” oteli 250 min kvadratmetrlik sahəni əhatə edir.

Antalyanın mərkəzindən 25 kilometr, Antalya hava limanından isə 50 kilometr uzaqlıqda yerləşən otel Aralıq dənizinin mavisi və Toros dağlarının əsrarəngiz təbiəti ilə əhatə olunub. “Rixos Sungate”də suit və villa olmaqla ümumilikdə 1094 otaq var. Otel VIP xidmətlər, türk, İtaliya, Meksika, Livan mətbəxinin təamlarını təqdim edir.

Kəmər bölgəsində ən unikal əyləncələri təqdim edən “Rixos Sungate”də müxtəlif musiqi festivalları təşkil edilir və dünya şöhrətli DJ-lər öz performanslarını sərgiləyirlər. Aprel ayının 28-dən mayın 5-dək oteldə keçirilən “MyFest - 2018” musiqi festivalında əsəsən Rusiya sou-biznesinin tanınmış simaları çıxış etdilər.

Qala içi adlanan qədim şəhər: Turist axınının daha çox qeydə alındığı məkan Qala içi adlanan qədim şəhərdir. Antalyanın görməli yerlərinin əksəriyyəti də demək olar ki, bu ərazidə yerləşir. Buradakı evlərin çoxu mehmanxana və restorana çevrilib. Yivli minarəsi Antalyanın simvolu hesab olunur. Hündürlüyü 39 metrə çatan abidə 1230-cu ildə Sultan Ələddin Keyqubad tərəfindən inşa edilib. Əsası XIX əsrdə qoyulan Saat qülləsi, Xıdırlıq qalası, Adrianın qapıları, Atatürk və Mərmərli parkları da şəhər sakinləri və qonaqların sevimli istirahət məkanlarıdır.

Antalya Aquarium: Nəhəng akvarium ilk ziyarətçilərini 2012-ci ilin avqustunda qəbul edib. Konyaaltı çimərliyindən 70 metr uzaqlıqda yerləşən Antalya Aquarium 15 min metr qapalı sahədə qurulub. Antalya Aquarium əyləncə və iaşə obyektləri ilə yanaşı, hər gün təbii qar yağdırılan Qar Dünyası və Buz Muzeyindən, zəhərli sürünənlər, nəhəng böcəklər və rəngarəng canlılarla dolu tropik bir macəra təqdim edən “WildPark”, çox ölçülü kino texnologiyası ilə dünya dənizlərinə virtual səyahəti təmin edən “Oceanride XD Cinema”dan ibarətdir. Antalya Aquarium Topkapı Sarayı və Ayasofya kimi Türkiyənin ən mühüm turistik məkanlarının yer aldığı və ölkənin ən çox turist qəbul edən yerləri sırasında ilk beşlikdə qərarlaşıb.

Düden şəlaləsi: Şəlalə Kepez Su Elektrik Stansiyasından başlayır və mənbəyi Düdenbaşı adlanan yerdir. Aşağı Düden və Yuxarı Düden adlanan iki qoldan ibarət olan şəlalə Antalyanın mərkəzindən təxminən 10 kilometr uzaqlıqda yerləşir. Aralıq dənizinə tökülən və müxtəlif mağaralardan ibarət olan şəlaləni dünyanın hər yerindən gələn turistlər ziyarət edir. Burada müxtəlif suvenirləri satılan dükanlar fəaliyyət göstərir.

Olimpos kanatı Kemerin ən məşhur yerlərindən biridir. Tahtalı Dağı ilə Kemer sahili boyunca uzanan və 2365 metr hündürlükdə yerləşən kanat dünyanın ən uzun ikinci, Avropanın isə ən uzun kanatıdır. Kanatla səyahət təxminən 10 dəqiqə çəkir. Burada günəş çıxmasını müşahidə etmək və təmiz havadan zövq almaq olar. Həmçinin burada 200 nəfərlik qapalı və açıq restoran, yığıncaq salonları, dağ paraşütü, durbinlə təchiz edilmiş müşahidə terrasları və möhtəşəm zirvə panoraması var.

Antalyanın Kemer bölgəsində təbiətin bütün gözəllikləri özündə cəmləyən Botanik Restoran Ulupınarda ziyarətçilər yeyəcəkləri balığı özlərinin ovlamaq imkanı var. Restoranın qonaqları şəlalələri, möhtəşəm çinar ağaclarını seyr edə bilərlər. Restoran Antalyadan 70 kilometr uzaqlıqda yerləşir və bənzərsiz təbii gözəllikləri, təcrübəli və seçmə işçi heyəti ilə fərqlənir.

Alanya Aralıq dənizi sahilində gözəl şərq şəhəri, eyni zamanda, Türkiyənin yazdan payıza kimi istirahət edə biləcəyiniz sərfəli kurortudur. Müxtəlif çalarlı isti dəniz, mavi bayraqlarla işarələnən möhtəşəm çimərliklər, gözəl mənzərələr, maraqlı çoxəsrlik tarix, su əyləncələri, parlaq gecə həyatı turistlərə buradakı istirahətini uzun müddət xatırladacaq. Alanya ən böyük mehmanxanalara malik turizm məkandır. Burada 40–dək ölkədən 15 minə yaxın insan mülk alıb və təxminən 10 mindən çox əcnəbi yaşayır.

Alanya qalası bu şəhərin simvollarından biridir. Dəniz səviyyəsindən 250 metrə qədər yüksələn yarımada üzərində yerləşir. Qala divarlarının uzunluğu 6,5 kilometrə qədərdir. Kandeleri adı ilə də tanınan Alanya yarımadasındakı yaşayış, Helenistik dövrə qədər birlikdə günümüzə gələn tarixi abidə XIII əsr Səlcuqlu əsəridir. Qala 1221-ci ildə şəhəri alıb yenidən inşa etdirən Səlcuqlu Sultanı I Əlaəddin Keyqubad tərəfindən tikdirilib. Qalanın 83 qülləsi və 140 bürcü var. Orta əsrlərdə qala divarların içində yerləşmiş şəhərin su ehtiyacı təmin etmək üçün 1200-ə yaxın su anbarı tikilib. Həmin su anbarlarının bir hissəsi hazırda istifadə edilir.

Damlataş Mağarası Alanyanın mərkəzindən 1 kilometr uzaqlıqda yerləşir. Qədim dövrlərdə formalaşdığı təxmin edilən karst mağarası 1948-ci ildə kəşf edilib. Təxminən 200 kvadratmetr ərazini əhatə edən mağaranın tavanının hündürlüyü 15 metrdir.

“Buta Airways”: Bakıdan Antalyaya səyahət etmək üçün ən sərfəli aviaşirkət

Azərbaycanın ilk aşağı büdcəli aviaşirkəti “Buta Airways” ötən ilin sentyabrından Antalya istiqamətində uçuşlara başlayıb. Uçuşlar 106 sərnişin tutan yeni, ən müasir və komfortabelli “Embraer 190” təyyarəsi ilə həyata keçirilir. Aviabiletlərin qiyməti isə 29 avrodan başlanır.

Lou-kost aviaşirkət olaraq “Buta Airways” aviareyslərdə baqajın, əl yükünün daşınması, təyyarə göyərtəsində isti yeməklər, eləcə də təyyarədə yer seçimi kimi əlavə xidmətləri ödəniş müqabilində təklif edir. Aviaşirkətin bütün reyslərində sendviçlər və su pulsuzdu, isti yemək isə aviabiletin alınması prosesi zamanı sifariş etmək mümkündür. Həmçinin təyyarənin göyərtəsində müxtəlif içkilər və soyuq qəlyanaltılar əldə etmək olar.

“Buta Airways”in reyslərində əlavə opsiyalar kimi təyyarə salonunda komfortlu yerlər təqdim olunur. Şirkətin aviareyslərində eyniadlı bort jurnalı pulsuz paylanılır. Jurnal həm Azərbaycan vətəndaşlarının, həm də Heydər Əliyev Beynəlxalq Hava Limanı vasitəsilə səyahət edən qonaqların və tranzit sərnişinlərin marağını cəlb edir. Jurnalda ölkəmizdə və xaricdə maraqlı və tanınmayan yerlər, milli mətbəx və aviaşirkətin uçuşlar yerinə yetirdiyi bu və ya digər şəhərdə vaxtın necə səmərəli keçirilməsi haqqında məlumatlar yer alır.

Loukoster aviaşirkəti Bakıdan bütün uçuşlarını Heydər Əliyev Beynəlxalq Aeroportunun “Terminal 2”nin Şimal girişi vasitəsilə yerinə yetirir. “Buta Airways” barədə bütün yenilikləri və xəbərləri “Buta Airways”in “facebook.com/ButaAirways”, “instagram.com/ButaAirways”, “twitter.com/ButaAirways” sosial şəbəkələrdəki səhifələrində izləmək mümkündür.

“Summer Tour” turizm şirkəti isə Bakıdan Türkiyənin, eləcə də Avropanın müxtəlif turizm bölgələrinə müxtəlif turizm bölgələrinə səfərlər təşkil edir. Antalyaya səyahət edən həmyerlilərimizin əksəriyyəti bu turizm şirkətinin xidmətlərindən istifadə edir.

Nihad Budaqov

AZƏRTAC-ın müxbiri

Bakı-Antalya-Alanya-Bakı

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.