UEFA Çempionlar Liqasının ilk yarımfinalçısı müəyyənləşib

Bakı, 13 aprel, Nicat Məmmədov, AZƏRTAC

Aprelin 12-də futbol üzrə UEFA Çempionlar Liqasının dörddəbir final mərhələsinin cavab görüşlərinə start verilib.

AZƏRTAC xəbər verir ki, yarımfinalın ilk iştirakçısı bəlli olub. Belə ki, İspaniyanın "Vilyarreal" klubu növbəti mərhələyə yüksəlib.

İlk oyunda doğma azarkeşlər önündə Almaniya "Bavariya"sını 1:0 hesabı ilə məğlub edən La Liqa təmsilçisi cavab görüşündə 1:1 hesablı heç-heçəyə nail olub. Oyunda ilk qolu 52-ci dəqiqədə Robert Levandovski vurub. Qonaqlar 88-ci dəqiqədə Samuel Çukvuezenin qolu ilə hesabı bərabərləşdiriblər. Bu nəticə ilə "Vilyarreal" yarımfinala vəsiqə qazanıb.