UFAZ abituriyentlər üçün məlumat sessiyası təşkil edib

Bakı, 20 may, AZƏRTAC

Bakı Fransız Liseyi və 132-134 nömrəli təhsil kompleksinin şagirdləri Azərbaycan Dövlət Neft və Sənaye Universitetinin (ADNSU) nəzdində fəaliyyət göstərən Azərbaycan-Fransız Universitetində (UFAZ) olublar.

UFAZ-dan AZƏRTAC-a bildirilib ki, qonaqlar əvvəlcə universitetin əsas korpusu ilə tanış olub və məlumat sessiyasında iştirak ediblər. Burada onlara UFAZ-a qəbul qaydaları və şərtləri, qeydiyyat prosedurları və universitetdəki tədris imkanları barədə məlumat verilib.

Sonra şagirdlər UFAZ-ın elmi laboratoriyalarına baş çəkiblər. Onlar kimya, fizika, geofizika, kompüter elmləri üzrə fərqli laboratoriyalarda tədris şəraiti ilə əyani tanış olaraq, yerli və Fransadan olan müəllimlərin hazırladıqları müxtəlif təcrübələrdə iştirak ediblər.