SİYASƏT
ÜMUMRUSİYA AZƏRBAYCAN KONQRESİ RUSİYA BAZARLARINDA TİCARƏTLƏ MƏŞĞUL OLAN ƏCNƏBİLƏR HAQQINDA QANUN LAYİHƏSİNİ TƏNQİD EDİR
Bəyanatda deyilir: “Bu “qanunvericilik təşəbbüsü” ona əsaslanır ki, milli diasporları formalaşdıran əcnəbi vətəndaşlar daha az mütəşəkkil olan rusiyalı biznesmenləri bazarlardan sıxışdırıb çıxarırlar. Söhbətin məhz hansı əcnəbilərdən getdiyinə heç kəsdə şübhə olmasın deyə, deputat Roqozin “Vedomosti” qəzetinə bildirmişdir ki, 1990-cı illərin əvvəllərindən bəri Azərbaycan qrupu meyvə-tərəvəz bazalarına tam nəzarət edir, 2005-ci ilin iyulundan isə Moskvadakı bütün bazalara azərbaycanlılar başçılıq edirlər. Özü də, qanun layihəsinin müəllifləri, onun mahiyyətinə rəğmən, iddia edirlər ki, bunu “ksenofobik qanun layihəsi adlandırmaq olmaz”. Halbuki onların təqdim etdikləri sənəd, bununla əlaqədar D.Roqozinin söylədikləri açıq-aşkar irqçi xarakter daşıyır, soydaşlarımızın hisslərini və ləyaqətini təhqir edir, millətlərarası ədavətin qızışdırılmasına yönəldilmişdir”.
Bəyanatda həmçinin bildirilir ki, Ümumrusiya Azərbaycan Konqresinin rəyasət heyəti “Rodina” fraksiyasının növbəti millətçi aksiyasından ciddi narahat olduğunu bildirir. Sənəddə deyilir ki, biz bu aksiyanı Rusiya Federasiyasının vətəndaşlarına və ona dost olan dövlətin həmin sahədə əmək fəaliyyəti ilə məşğul olan vətəndaşlarına qarşı təqiblərin təşkilinə qanuni xarakter vermək cəhdi kimi qiymətləndiririk. “Rodina” fraksiyasının təklif etdiyi qanun layihəsi sahibkarlıq fəaliyyətinin müxtəlif sahələrini tənzimləyən və rəqabət mühiti yaradılmasına, beynəlxalq iqtisadi əməkdaşlığıln inkişafına yönəldilmiş Rusiya qanunvericiliyinin müddəalarına aşkar surətdə ziddir.
Bəyanatda daha sonra deyilir: “Elə təsəvvür yaranır ki, bu aksiya “Rodina” partiyası liderinin Moskva Şəhər Dumasına seçki kampaniyasının gedişində moskvalıların diqqətini özünə cəlb etmək niyyətindən irəli gəlir. Bununla əlaqədar ÜAK-ın rəyasət heyəti diqqəti seçki kampaniyasının gedişində paytaxt əhalisinin müəyyən təbəqələrində qafqazlılar barəsində qərəzli hisslər doğurmağın yolverilməzliyinə və cinayətkarlığına cəlb edir. Belə əməllər millətlərarası sülhə və RF xalqlarının həmrəyliyinə əhəmiyyətli dərəcədə ziyan vura bilər ki, bu da çoxmillətli Rusiya dövlətinin birliyinə və bütövlüyünə ciddi təhlükədir”.