ELM VƏ TƏHSİL


UNEC-də akademik Ziyad Səmədzadənin 80 illiyinə həsr olunan virtual sərgi

Bakı, 25 iyun, AZƏRTAC

Azərbaycan Dövlət İqtisad Universitetində (UNEC) Milli Məclisin deputatı, akademik Ziyad Səmədzadənin 80 illik yubileyinə həsr edilən virtual sərgi hazırlanıb.

UNEC-dən AZƏRTAC-a bildirilib ki, virtual sərgidə akademikin Azərbaycan və rus dillərində nəşr edilmiş monoqrafiyaları nümayiş olunub.

Mütərəqqi iqtisadi ideyaların daşıyıcısı və təbliğatçısı, nüfuzlu iqtisadçı alim, bacarıqlı təşkilatçı kimi tanınan akademik Ziyad Səmədzadə 500-dən çox elmi əsərin, o cümlədən bir sıra sanballı elmi araşdırmaların, dəyərli monoqrafiyaların müəllifidir. Respublikada iqtisad elminin aparıcı istiqamətlərinin yaranması, formalaşması və inkişafı, bütövlükdə Azərbaycanın xalq təsərrüfatında əmək məhsuldarlığının dinamika və səviyyəsi, onun əsas amillərinin sistemli təhlili, iqtisadiyyatda struktur irəliləyişləri ilə qarşılıqlı əlaqəsinin dərin təhlili, iqtisadi tərəqqi amilləri barədə dolğun elmi konsepsiyanın formalaşması da akademik Ziyad Səmədzadənin fəaliyyəti ilə bağlıdır.

UNEC-in müxtəlif layihələrində və mühüm tədbirlərində hər zaman yaxından iştirak edən, dəyərli fikirləri və strateji proqram xarakterli çıxışı ilə gənclərə örnək olan alimin iqtisadi inkişafın, milli gəlirin, əmək ehtiyatlarının, makroiqtisadiyyat, regional və bazar iqtisadiyyatının səmərəlilik problemlərinin tədqiqinə həsr edilmiş sanballı monoqrafiyaları iqtisad elminə layiqli töhfələrdir.

Milli Məclisin deputatı kimi respublikada iqtisadi qanunvericilik bazasının möhkəmləndirilməsi, büdcə sisteminin təkmilləşdirilməsi, iqtisadi innovasiyaların inkişafı və s. məsələlərin həllində fəal iştirak edən akademik səriştəli iqtisadçı kadrların hazırlanmasında, yüksəkixtisaslı elmi tədqiqatçıların yetişdirilməsində də mühüm xidmətlər göstərib. Onun elmi rəhbərliyi ilə 50-dən çox namizədlik və doktorluq dissertasiyaları müdafiə edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.