ELM VƏ TƏHSİL
UNEC yeni tədris ilinə yüksək keyfiyyət göstəriciləri ilə başlayıb
Bakı, 20 sentyabr, AZƏRTAC
Azərbaycan Dövlət İqtisad Universitetində (UNEC) elmi şuranın yeni tədris ilində ilk iclası keçirilib.
UNEC-dən AZƏRTAC-a bildirilib ki, rektor Ədalət Muradov yeni tədris ilinin başlanması münasibətilə şura üzvlərini təbrik edib, onlara işlərində uğurlar arzulayıb.
Tədrisin keyfiyyətinin qiymətləndirilməsi və idarəedilməsi mərkəzi direktorunun müavini, dosent Söhrab İsayev 2017/2018-ci tədris ilinin yay imtahan sessiyasının yekunları barədə hesabatla çıxış edib. S.İsayev imtahan nəticələri ilə bağlı apellyasiya şikayətlərinin nəzərəçarpacaq dərəcədə azaldığını, ümumilikdə isə imtahanların ötən dövrlərlə müqayisədə daha mütəşəkkil təşkil olunduğunu diqqətə çatdırıb. Elmi şuranın iclasında ilk dəfə yay semestri ilə bağlı müzakirələr aparılıb. Bildirilib ki, yay semestrinin təşkilində institutlaşmaya ehtiyac var.
Tədris və təlim texnologiyaları üzrə prorektor, professor Damət Bağırov UNEC-də, Dərbənd və Zaqatala filiallarında, Maliyyə-İqtisad Kollecində yeni tədris ilinə hazırlıqla bağlı məruzə ilə çıxış edib. Bildirilib ki, yeni tədris ilindən UNEC-in Dərbənd filialında ali təhsil ilə yanaşı, orta ixtisas təhsili üzrə mütəxəssis hazırlığı da həyata keçiriləcək. Beləliklə də UNEC təhsilin hər iki istiqaməti üzrə ölkə xaricində tədris fəaliyyəti göstərən ilk Azərbaycan universiteti olub.
İclasda 2018/2019-cu tədris ili üçün qəbul imtahanlarının nəticələri də açıqlanıb. Yeni tədris ilində UNEC-ə bakalavriat səviyyəsi üzrə qəbul planının 92,1 faiz yerinə yetirildiyi qeyd edilib. Ən yüksək bal toplayanların qəbul sayında ciddi irəliləyişin olduğu diqqətə çatdırılıb, II ixtisas qrupu üzrə 600-dən yüksək bal toplayanların 63 faizinin (I ixtisas qrupu üzrə isə bir nəfər) seçiminin məhz UNEC olduğu bildirilib, bunun isə 2014-cü illə müqayisədə 3,8 dəfə artdığı xüsusi vurğulanıb.
Həmçinin 2018/2019-cu tədris ili üçün Beynəlxalq Magistratura və Doktorantura Mərkəzinə (BMDM) qəbulun nəticələri açıqlanıb. Bildirilib ki, ölkənin ali təhsil müəssisələrinə magistratura pilləsi üzrə qəbul planı 74,87 faiz yerinə yetirildiyi halda, UNEC-də BMDM-a qəbul planı 91,4 faiz, Magistratura mərkəzində 84,1 faiz, UNEC Biznes Mərkəzində isə 97 faiz yerinə yetirilib.
Şura üzvləri UNEC-in Zaqatala filialına daha çox abituriyent cəlb etmək məqsədilə filialda təhsil alan tələbələrin təkrar imtahanlara görə ödənişlərinin həcminin 25 faizdən 10 faizə endirilməsi barədə qərar qəbul edib. Rusiya vətəndaşlarının UNEC-in Dərbənd filialında təhsil alması üçün əlçatanlığını artırmaq məqsədilə isə təhsil haqqının 26 min rubl məbləğində müəyyənləşdirilməsi şurada təsdiqlənib.
Qeyd olunub ki, UNEC missiyasını layiqli şəkildə yerinə yetirmək və müəyyənləşdirdiyi vizyonunu reallığa çevirmək məqsədilə “UNEC dəyərləri” müəyyən olunub. Akademik azadlıq, etika, layiqlilik, şəffaflıq, mükəmməllik, keyfiyyətlilik, iştirakçılıq, fərqliliklərə hörmət, cəmiyyət mənafeyini düşünmək kimi yüksək mənəvi keyfiyyətləri özündə birləşdirən “UNEC dəyərləri” şura üzvləri tərəfindən yekdilliklə qəbul edilib.