CƏMİYYƏT


ÜST COVID-19-la bağlı “Hamısını et” adlı yeni kampaniyaya başlayıb

Bakı, 27 aprel, AZƏRTAC

Ümumdünya Səhiyyə Təşkilatı (ÜST) COVID-19-a qarşı qabaqlayıcı tədbirlərin əhəmiyyətini bir daha vurğulamaq üçün “Hamısını et” adlı yeni kampaniyaya başlayıb.

AZƏRTAC xəbər verir ki, bununla bağlı ÜST-nin Azərbaycandakı nümayəndəliyinin yaydığı məlumatda deyilir: “Avropanın böyük bir hissəsində koronavirusa yoluxma hallarının sayında artım müşahidə edilir. COVID-19 xəstələrinin sayının artmasına səbəb ictimai səhiyyə tədbirlərinin yumşaldılması, ştammların davamlı dövriyyəsi və insanların ehtiyatı əldən verməsidir. Zəruri ictimai səhiyyə tədbirləri bu mübarizənin təməlidir.

Dövlət səhiyyə orqanları üçün bu, test, təmasın izlənməsi, izolyasiya, karantin və keyfiyyətli səhiyyə xidməti deməkdir. Fərdlər üçün isə kütləvi məkanlardan uzaq olmaq, fiziki məsafə saxlamaq, əl gigiyenası, maskadan istifadə və qapalı yerlərin havalandırması vacib olaraq qalmaqdadır. Virusun ötürülməsinin öz-özünə azalacağını gözləməkdənsə, yayılma sürətini aşağı salmalıyıq.

Bunu etmək üçün əl yuma, maskadan istifadə və fiziki məsafə kimi COVID-19 və mövcud ştammlara qarşı effektiv olan qoruyucu tədbirlərə davam etməyimiz gərəkdir.

Biz bir deyil, bir neçə peyvənddən qlobal istifadənin başlanğıc mərhələsindəyik və bu, pandemiyanın indiki mərhələsinin sona çatması üçün böyük bir addımdır. Peyvəndlərin əhatə dairəsi artdıqca, xəstəlik və ölüm hallarını azaltmaq və zəruri səhiyyə xidmətlərini davam etdirmək mümkün olacaq. Bununla birlikdə, ötürülmə nisbətini və virusun mutasiya imkanını azaltmaq üçün qoruyucu tədbirlərin hamısını etməliyik. Peyvənd olunmaq qabaqlayıcı tədbirləri dayandırmaq, özümüzü və digərlərini riskə atmaq demək deyil.

ÜST-nin Avropa üzrə Regional Ofisinin #HamısınıEt kampaniyası hər kəsi bütün qabaqlayıcı tədbirlərə davam etməyə çağırır. Buraya daxildir:

o Əlləri yumaq

o Burnu, ağzı və çənəni əhatə edən maska taxmaq

o Kütləvi məkanlardan uzaq olmaq və fiziki məsafəni qorumaq

o Mümkün olduqda pəncərələri açmaq və havalandırmanı yaxşılaşdırmaq

o Öskürəndə ağzı və burnu örtmək

o Səhiyyə qurumlarının tövsiyəsinə uyğun olaraq sıranız gələndə peyvənd olunmaq”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.