Bakı, 21 aprel, AZƏRTAC

Dövlət başçısının tapşırığına uyğun olaraq, respublikanın yol infrastrukturunun yenidən qurulması, müasir səviyyəyə çatdırılması istiqamətində həyata keçirilən layihələrdən bəziləri Ucar, Zərdab, Ağcabədi, Yevlax və Şəki rayonları ərazisində icra olunur.

Azərbaycan Avtomobil Yolları Dövlət Agentliyinin İctimaiyyətlə əlaqələr şöbəsindən AZƏRTAC-a bildirilib ki, Azərbaycan Hökuməti ilə Asiya İnkişaf Bankı arasında imzalanmış kredit sazişi çərçivəsində Şəki rayonunun Dərəcənnət və Təpəcənnət, Yevlax rayonunun Qaraoğlan və Quşçu, Ucar rayonunun Alpı və Qulabənd, Zərdab rayonunun Yarməmmədbağı, Körpükənd və Əlvənd və Ağcabədi rayonunun Şənlik kənd yollarının bərpasının maliyyələşdirilməsi qərara alınıb. Layihəyə əsasən, sözügedən kənd yollarının ümumi uzunluğu 61.7 kilometrdir. IV texniki dərəcəyə uyğun olaraq bərpa edilən yolların hər birinin eni 10 metr təşkil edir. Yolların gediş-gəliş hissəsinin eni 3.5 metr olmaqla 7 metr, çiyinlərin eni isə hər bir istiqamət üzrə 1.5 metr olmaqla 3 metrə bərabərdir.

Görülən işlər çərçivəsində Şəki rayonu ərazisində Təpəcənnət və Dərəcənnət kənd yolları layihəyə uyğun olaraq, torpaq yatağının normativ eninin alınması üçün genişləndirilib və yeni yol yatağı inşa olunub. Bununla yanaşı, uzunluğu 5.2 kilometr olan Təpəcənnət yolunda 14 ədəd, uzunluğu 6.2 kilometr olan Dərəcənnət kənd yolunda isə 24 dairəvi suötürücü boru quraşdırılıb, həmçinin 1 düzbucaqlı su keçidi inşa edilib. Hazırda hər iki yola 2 laydan ibarət yeni asfalt-beton örtüyü döşənir.

Layihəyə uyğun olaraq, Yevlax rayonunda da 2 kənd yolunun yenidən qurulması işləri icra olunur ki, artıq bu işlər də son mərhələdədir. Bu, 4.4 kilometr uzunluğa malik Qaraoğlan və 3.2 kilometrlik Quşçu kənd yollarıdır.

Sözügedən kənd yolları boyunca deformasiyaya uğramış örtüyün bərpası məqsədilə zəruri yerlərdə yol yatağı qazılaraq çıxarılıb, yeni yol yatağının inşası aparılıb. Yol yatağı hazır olan hissələrdə yol əsasının tikintisi işləri həyata keçirilir və hərəkət hissə asfalt örtüyü döşənməsi üçün hazır vəziyyətə gətirilir. Yollar boyunca mövcud suötürücü borular istismara yararsız vəziyyətdə olduğundan, ümumilikdə 57 nöqtədə dairəvi suötürücü boruların quraşdırılması işləri yerinə yetirilir.

Ucar rayonunda isə 3.5 kilometr uzunluğa malik Alpı və 3.4 kilometrlik Qulabənd kənd yolları inşa edilir. Hər iki yolda işlər artıq yekunlaşmağa doğru gedir. Belə ki, “İnşaat Norma və Qaydaları”nın tələblərinə əsasən, sözügedən yollarda yeni yol yatağı inşası yekunlaşdırılıb. Hazırda layihədə nəzərdə tutulmuş qalınlıqda qum-çınqıl və optimal-qırmadaş qarışığından istifadə olunmaqla yol əsasının inşası aparılır, yollar boyunca ümumilikdə 31 ədəd dairəvi suötürücü boru quraşdırılır. Bunun ardınca isə yollara 2 qat olmaqla yeni asfalt-beton örtüyünün döşənməsi nəzərdə tutulur.

Analoji işlərin icrası Zərdab rayonu ərazisindəki uzunluğu 15.9 kilometr olan Yarməmmədbağı, 4.7 kilometr uzunluğa malik Körpükənd və 5 kilometrlik Əlvənd kəndlərinin yollarında başlanılıb. Hazırda yollar boyu xüsusi texnikalardan istifadə olunmaqla yatağın genişləndirilərək profilə salınması və IV texniki dərəcəyə uyğun inşası, həmçinin lazımi qarışıqlardan istifadə olunmaqla yol əsasının tikintisi işləri həyata keçirilir. Layihə üzrə Yarməmmədbağı, Körpükənd və Əlvənd kənd yollarında müvafiq olaraq 20, 10 və 9 dairəvi suötürücü borunun quraşdırılması da nəzərdə tutulur.

Zərdab rayonu ilə yanaşı, Ağcabədi rayonunda Şənlik kəndi yolunun da yenidən qurulması işlərinə başlanılıb. Hazırda kəndə gedən 10.2 kilometrlik yolda yeni torpaq yatağı və yeni yol əsası inşa edilir. Mövcud suötürücü borular istismara yararsız vəziyyətdə olduğundan 16 nöqtədə dairəvi suötürücü boruların quraşdırılması işləri və mövcud 2 avtomobil körpüsünün əsaslı şəkildə təmiri də layihəyə daxil edilib.

Texnoloji ardıcıllığa uyğun olaraq, torpaq işlərindən sonra Şənlik kənd yoluna əlaqələndirici bitum səpilməklə iri və xırda dənəli asfalt-beton örtüyünün döşənməsi işləri icra olunacaq. Tikintiyə texniki nəzarət işlərini İtaliyanın “IRD Engineering” şirkəti yerinə yetirir. Ümumilikdə isə tikinti işləri tərtib olunmuş qrafiklə və yüksək keyfiyyətlə aparılır. Bunun üçün əraziyə lazımi sayda canlı qüvvə və texnika cəlb olunub.

Əsaslı şəkildə yenidən qurulan yerli əhəmiyyətli yollar qeyd edilən 10 kəndin 12 mindən artıq əhalisi ilə yanaşı, bu yollardan istifadə edən bütün vətəndaşların rahat gediş-gəlişini təmin edəcək. Bundan başqa, əhali tərəfindən yetişdirilən kənd təsərrüfatı məhsullarının tez və xarab olmadan rayon mərkəzinə və qonşu rayonlara daşınmasına şərait yaratmaqla bu sahənin inkişafına gətirib çıxaracaq.