REGİONLAR
Üçrəngli bayrağımız xalqımızın mübarizlik ruhunun simvoludur
Naxçıvan, 17 noyabr, AZƏRTAC
Naxçıvan Dövlət Universitetində “Bayrağım – qürurum, mənliyim” adlı foto-video, əl işləri müsabiqəsinə yekun vurulub.
AZƏRTAC-ın Naxçıvan bürosu xəbər verir ki, müsabiqədə fərqlənən tələbələrin mükafatlandırılması mərasimində çıxış edən universitetin rektoru, AMEA-nın müxbir üzvü Saleh Məhərrəmov Azərbaycan Xalq Cümhuriyyətinin üçrəngli bayrağının ulu öndər Heydər Əliyevin təşəbbüsü ilə 1990-cı il noyabrın 17-də Naxçıvan Muxtar Respublikasının Dövlət bayrağı kimi qəbul olunduğunu diqqətə çatdırıb.
“Naxçıvan Muxtar Respublikası Ali Məclisi Sədrinin 2014-cü il avqustun 22-də imzaladığı Sərəncama əsasən Naxçıvan şəhərində Dövlət Bayrağı Meydanı və Muzeyi yaradılıb” – deyən Saleh Məhərrəmov vurğulayıb ki, Ali Məclis Sədrinin “Naxçıvan Muxtar Respublikasının Dövlət Bayrağı haqqında” 2014-cü il 17 noyabr tarixli Sərəncamına əsasən, hər il noyabr ayının 17-si Naxçıvan Muxtar Respublikasının Dövlət Bayrağı Günü kimi qeyd edilir.
Sonra müsabiqənin qalibləri elan olunub. Qeyd edək ki, müsabiqəyə universitetin “Instagram” səhifəsində yerləşdirilmək üçün 100 şəkil, 30-a yaxın video, 20-yə yaxın əl işi buraxılıb. Qaliblər 20 gün müddətində ən çox bəyənilən hər nominasiya üzrə 10 yaradıcı iş arasından seçilib. Peşəkar münsiflərin rəyinə əsasən, foto nominasiyasında menecment ixtisası üzrə III kurs tələbəsi Orxan Həsənov müsabiqənin qalibi olub. Mühasibat uçotu və audit ixtisası üzrə I kurs tələbəsi Əhməd Əhmədzadə II, dövlət bələdiyyəsi ixtisası üzrə I kurs tələbəsi Emil Allahverdiyev III yeri tutub. Dəmiryol nəqliyyatı və təsərrüfatı mühəndisliyi ixtisası üzrə IV kurs tələbəsi Samir Abbasov video nominasiyası üzrə qalib olub. Təhsildə qiymətləndirmə və monitorinq ixtisası üzrə I kurs magistrant Süməyya İmanova II, kimya müəllimliyi ixtisası üzrə IV kurs tələbəsi Əfruz Mərdanov, müalicə işi ixtisası üzrə I kurs tələbəsi Mojtaba Azam III yerə layiq görülüblər.
Əl işlərinin qiymətləndirilməsi zamanı tələbələrin şəxsi yaradıcılıq qabiliyyətləri, ideya axtarışları əsas götürülüb. Dünya iqtisadiyyatı ixtisası üzrə Kamal Babazadə müsabiqənin qalibi olub. Memarlıq ixtisası üzrə I kurs tələbəsi İlahə Babayeva II, Azərbaycan dili və ədəbiyyat müəllimliyi ixtisası üzrə II kurs tələbəsi İnci Qasımova, rus dili ixtisası üzrə III kurs tələbəsi Fatma Babayeva III, Azərbaycan dili ixtisası üzrə II kurs magistrant Nuridə Məmmədova IV yerə layiq görülüblər. Bu nominasiya üzrə həvəsləndirici yeri təsviri incəsənət tarixi və nəzəriyyəsi ixtisası üzrə I kursun magistrantları Həbib Allahverdiyev və Şəmsiyyə Zalova tutublar.
Tələbələr təhsildə onlar üçün yaradılan şəraitə görə minnətdarlıq ediblər.
Qaliblər universitetin diplom və pul mükafatı ilə təltif olunublar.
X X X
Ümummilli lider Heydər Əliyevin 1990-cı illərin əvvəllərində muxtar respublikaya rəhbərlik etdiyi illər qədim diyarımızın düşmən təcavüzündən qorunaraq gələcək inkişaf mərhələsinin təməlinin qoyulması, milli dövlətçilik ənənələrinin təşəkkülü istiqamətində tarixi qərarlara imza atılması ilə səciyyələnir.
Bu fikirlər Yeni Azərbaycan Partiyası (YAP) AMEA Naxçıvan Bölməsinin müəssisədənkənar ərazi ilk təşkilatı tərəfindən keçirilən “Ulu öndər Heydər Əliyev və Naxçıvan: ideyadan reallığa” adlı tədbirdə səsləndirilib.
Tədbirdə çıxış edən bölmənin sədri, akademik İsmayıl Hacıyev ulu öndər Hеydər Əliyеvin dövlətçilik ənənələrinin bərpa və inkişaf etdirilməsinə yönələn fəaliyyətindən geniş danışıb.
Sonra bölmənin YAP müəssisədənkənar ərazi ilk təşkilatının sədri, dosent Orxan Bağırovun məruzəsi dinlənilib.
Diqqətə çatdırılıb ki, ümummilli lider Heydər Əliyevin təşəbbüsü və rəhbərliyi ilə 1990-cı il noyabrın 17-də Naxçıvan Muxtar Respublikası Ali Məclisinin sessiyasında ilk dəfə olaraq milli dövlətçilik ənənələrinin dirçəldilməsi baxımından qəbul edilən “Naxçıvan MSSR-in adının dəyişdirilməsi haqqında”, “Naxçıvan Muxtar Respublikası Ali Dövlət hakimiyyəti orqanı haqqında”, “Naxçıvan Muxtar Respublikasının dövlət rəmzləri haqqında”, “1990-cı ilin yanvar ayında Bakı hadisələrinə siyasi qiymət verilməsi haqqında” və digər qərarlar mühüm tarixi əhəmiyyət daşıyır.
“Azərbaycan Xalq Cümhuriyyətinin 9 noyabr 1918-ci ildə qəbul etdiyi üçrəngli bayraq ilk dəfə 17 noyabr 1990-cı ildə ümummilli lider Hеydər Əliyеvin sədrliyi ilə keçirilən Naxçıvan Muxtar Respublikası Ali Məclisinin sessiyasında muxtar respublikanın Dövlət bayrağı kimi təsis olunub”, – deyən Orxan Bağırov vurğulayıb ki, 1991-ci il fevralın 5-də Azərbaycan Respublikası Ali Soveti Naxçıvan Muxtar Respublikası Ali Məclisinin vəsatətinə baxıb və üçrəngli bayrağın Azərbaycanın Dövlət bayrağı kimi qəbul edilməsi haqqında qərar verib.
Qeyd olunub ki, Naxçıvan Muxtar Respublikası Ali Məclisi Sədrinin 2014-cü il 22 avqust tarixli Sərəncamına əsasən, Naxçıvan şəhərində Dövlət Bayrağı Meydanı və Muzeyinin yaradılması qədim dövlətçilik tariximizin öyrənilməsi və təbliği baxımından mühüm əhəmiyyət daşıyır. Ali Məclis Sədrinin “Naxçıvan Muxtar Respublikasının Dövlət Bayrağı haqqında” 2014-cü il 17 noyabr tarixli Sərəncamı ilə muxtar respublikada hər il Dövlət Bayrağı Günü qeyd olunur.
X X X
Bu gün milli siyasət və ideologiyanın ən mühüm simvolu olan Azərbaycanın üçrəngli bayrağı 1990-cı il noyabrın 17-də ümummilli lider Heydər Əliyevin rəhbərliyi ilə Naxçıvanda əbədi yüksəkliyə qaldırılıb.
Bu barədə Naxçıvan Muxtar Respublikası Mədəniyyət Nazirliyinin təşkilatçılığı ilə Naxçıvan şəhərindəki Dövlət Bayrağı Muzeyində keçirilən tədbirdə mədəniyyət naziri Natəvan Qədimova danışıb.
“Müstəqilliyimizin, dövlətçiliyimizin və milli dəyərlərimizin daşıyıcısı olan üçrəngli bayrağımıza ümumxalq sevgisinin formalaşdırılması Heydər Əliyev siyasi yolunun əsasını təşkil edir”, - deyən nazir vurğulayıb ki, çoxəsrlik dövlətçilik tariximizdə qəbul olunmuş rəmzlərin, rəsmi şəkildə istifadə edilmiş bayraqların bütöv bir sistem halında tədqiq edilməsi milli ideologiyanın tarixi köklərini və mahiyyətini müəyyən etmək baxımından mühüm əhəmiyyətə malikdir.
Nazir diqqətə çatdırıb ki, Azərbaycanın üçrəngli bayrağı dövlətimizin müstəqilliyinin, xalqımızın milli mənsubiyyətinin, tarixinin, mənəvi dünyasının rəmzidir. Hər bir Azərbaycan vətəndaşı bayrağımıza ehtiram göstərir. Azərbaycan əsgəri Vətənin suverenliyinin və ərazi bütövlüyünün qorunması ilə bağlı ali missiyanı öz üzərinə götürərkən üçrəngli bayrağa and içir. 17 noyabr tarixinin Naxçıvan Muxtar Respublikasının Dövlət Bayrağı Günü kimi qeyd edilməsi hər bir Azərbaycan vətəndaşına milli qürur yaşadır.
Sonra muzeyin ekspozisiyasına baxış olub.
X X X
Naxçıvan Muxtar Respublikasının Dövlət Bayrağı Gününün təsis edilməsi Naxçıvanda dövlət atributlarına ehtiramın ifadəsidir.
Bu fikir Yeni Azərbaycan Partiyası Naxçıvan Şəhər Təşkilatı Gənclər Birliyi tərəfindən “Naxçıvandan yüksəlib dalğalanan Dövlət bayrağı” mövzusunda keçirilən tədbirdə səsləndirilib.
Naxçıvan şəhərindəki Dövlət Bayrağı Muzeyində təşkil olunan tədbirdə təşkilat aparatının baş təlimatçısı, partiyanın Naxçıvan Şəhər Təşkilatı Gənclər Birliyinin üzvü Cəlal Həsənli çıxışında bildirib ki, Azərbaycan Xalq Cümhuriyyətinin yadigarı olan üçrəngli Dövlət bayrağı 1990-cı il noyabrın 17-də xalqımızın ümummilli lideri Heydər Əliyevin sədrliyi ilə keçirilən Naxçıvan Muxtar Respublikası Ali Məclisinin sessiyasında muxtar respublikanın Dövlət bayrağı kimi təsdiq edilib, Azərbaycan SSR Ali Soveti qarşısında həmin bayrağın Azərbaycanın rəsmi dövlət rəmzi kimi tanınması haqqında vəsatət qaldırılıb. 1991-ci il fevralın 5-də Azərbaycan SSR Ali Soveti üçrəngli bayrağın Azərbaycanın Dövlət bayrağı kimi qəbul olunması haqqında qərar qəbul edib.
Vurğulanıb ki, Naxçıvan Muxtar Respublikası Ali Məclisi Sədrinin “Naxçıvan şəhərində Dövlət Bayrağı Meydanı və Muzeyinin yaradılması haqqında” 2014-cü il 22 avqust tarixli Sərəncamına əsasən Naxçıvan şəhərində Dövlət Bayrağı Meydanı və Muzeyinin yaradılması, eləcə də 2014-cü il 17 noyabr tarixli Sərəncamı ilə Naxçıvan Muxtar Respublikasının Dövlət Bayrağı Gününün təsis edilməsi Naxçıvanda dövlət atributlarına ehtiramın ifadəsidir.
Qeyd olunub ki, bayrağımızı hər bir azərbaycanlının qürur mənbəyinə çevirən bu müqəddəs rəmzin xalqımızın mübarizlik ruhunun simvolu olmasıdır. Bu ruh Azərbaycan xalqının yenilməz mənəviyyatının təzahürüdür. Məhz mübarizlik və yenilməzlik ruhu sayəsində tarixin bütün dönəmlərində, həm də qədim Naxçıvanın timsalında Azərbaycan dövlətçiliyi öz kökləri ilə keçmişinə bağlı olub, tarixi ilə birgə yaşamağı, keçmişi ilə bu gününün vəhdətini yaratmağı bacarıb. Ona görə də dövlətçiliyimiz milli siyasət və ideologiyanın ən mühüm simvolu olan tarixi bayraq ənənəsində də özünün maddi, mənəvi və siyasi mədəniyyətinin əsas özəlliklərini, başlıcası isə ölməz milli ruhunu daim yaşatmaqdadır.
Sonra muzeyin ekspozisiyasında nümayiş etdirilən eksponatlara baxılıb.