MƏDƏNİYYƏT
“Uğur qatarım” - Xətai Sənət Mərkəzində açılan növbəti sərgi belə adlanır
Bakı, 8 fevral, AZƏRTAC
Fevralın 8-də Xətai Sənət Mərkəzində istedadlı rəssam, Respublika Uşaq və Gənclər İnkişafı Mərkəzinin şagirdi Məryəm Məmmədovanın “Uğur qatarım” adlı fərdi sərgisi açılıb.
AZƏRTAC xəbər verir ki, Xətai Sənət Mərkəzinin dəstəyi ilə reallaşan sərgidə rəssamın 60-dan çox müxtəlif mövzulu rəsm əsərləri yer alır.
Sərginin açılışından öncə Məryəm Məmmədova təəssüratlarını bölüşərək əsərləri haqqında məlumat verib. Hələ uşaqlıqdan onda incəsənətə maraq olduğunu deyən rəssam söyləyib ki, müəyyən vaxt keçdikdən sonra onun marağı sənətə sevgi ilə əvəzlənib. Vurğulayıb ki, o, rəngli karandaş, sulu boya, quaş, akril, yağlı boya, qarışıq texnikada işləməyi xoşlayır. Rəssam sərgidə nümayiş olunan əsərlərin müxtəlif mövzularda –təbiət gözəllikləri, insani hisslər kimi mövzularda olduğunu da söyləyib.
“Ekspozisiyadan da göründüyü kimi, qeyd etdiyim mövzuları tablolaşdırmağı sevirəm. İncəsənət mənim üçün müqəddəs bir peşədir. Gələcəkdə daha möhtəşəm sənət əsərləri ilə ölkəmizi beynəlxalq səviyyəli müsabiqə və festivallarda təmsil etməyi qarşıma məqsəd qoymuşam. Özümlə yanaşı, sənətdə olan bütün həmkarlarıma da uğurlar arzulayıram”, - deyə Məryəm Məmmədova bildirib.
Sərginin açılış mərasimində Əməkdar artist Teymur Məmmədov çıxış edərək əsərlərin məziyyəti haqqında danışıb. Bildirib ki, Xətai Sənət Mərkəzində mütəmadi olaraq belə sərgilərin təşkili olduqca əlamətdardır. Qeyd edib ki, mərkəzdə açılan sərgilər incəsənətin inkişafına dəstək göstərməklə yanaşı, eyni zamanda, əsərləri nümayiş edilən rəssamlara da bir növ dəstək xarakteri daşıyır.
“Dünya mədəniyyətində elə sənət əsərləri var ki, insan onlara baxdıqda yorulmur, əksinə ruhu yenilənir. Məryəm Məmmədovanın əsərləri bizlərdə belə təəssürat yaradır. Məryəmin burada təqdim olunan əsərləri məna və məzmun baxımından da dolğundur. Bu əsərlərin mükəmməlliyi özəlliyi ilə hiss olunur. Təbrik edir, ona yeni yaradıcılıq uğurları arzulayıram”, - deyə Əməkdar artist söyləyib.
Rəssamın müəllimləri Esmiralda Tağıyeva və Sara Əfəndiyeva şagirdlərinin istedadından və onun incəsənətə olan sevgisindən danışıb, sənətdə ondan gözləntilərinin çox olduğunu vurğulayıblar. Diqqətə çatdırılıb ki, Məryəmin yaradıcılığında dekorativ işlər - batik, daş, şüşə, çini qablar üzərində naxış kimi işlər də xüsusi yer tutur.
Xətai Sənət Mərkəzinin direktoru Zahid Əvəzov və rəssamın yaxın qohumları çıxış edərək sərginin əhəmiyyətindən bəhs edib, gənc rəssama yeni yaradıcılıq axtarışlarında uğurlar diləyiblər.
Sonra qonaqlar sərgiyə baxıblar.
Sərgi çərçivəsində Məryəm Məmmədovaya Xətai Sənət Mərkəzinin diplomu təqdim olunub.