Ukrayna Türkiyəyə 87 nəfərlik axtarış-xilasetmə qrupu göndərir

Kiyev, 7 fevral, AZƏRTAC

Fevralın 7-də Ukraynanın Baş naziri Denis Şmıqal zəlzələnin nəticələrinin aradan qaldırılmasında Türkiyə Respublikasına yardımın göstərilməsi haqqında sərəncam imzalayıb. Onun sözlərinə görə, axtarış-xilasetmə qrupu Ukraynadan yola düşəcək.

AZƏRTAC xəbər verir ki, bu barədə Ukrayna hökumətinin saytı məlumat yayıb.

Fövqəladə Hallar üzrə Dövlət Xidmətinin axtarış-xilasetmə qrupu An-32 və An-26 təyyarələri, eləcə də avtomobillərlə zəlzələnin nəticələrinin aradan qaldırılmasına kömək göstərmək üçün Türkiyəyə yola düşəcək. Birləşmiş axtarış-xilasetmə qrupuna 87 nəfər, o cümlədən 10 nəfər təyyarə ekipajının üzvləri daxildir.

Bundan başqa, Şmıqal İqtisadiyyat və Maliyyə nazirliklərinə birlikdə zəlzələdən sonra Türkiyə Respublikasına yardımın göstərilməsi ilə bağlı xərclərin ödənilməsi məsələsini işləyib hazırlamaq tapşırıb.

Emil Hüseynli

AZƏRTAC-ın xüsusi müxbiri

Kiyev