Kiyev, 27 sentyabr, AZƏRTAC

İlk növbədə, bu müharibədə həlak olmuş hərbçilərin doğmalarına və yaxınlarına başsağlığı verirəm. Onların, həmçinin Bərdə və Gəncə şəhərlərinin şiddətli atəşə tutulması nəticəsində həlak olmuş günahsız vətəndaşların ölümü Azərbaycan milləti üçün əvəzedilməz itkidir. Bu insanların rəşadəti ölməzdir. Mən əminəm ki, onların xatirəsi əbədi yaşayacaq!

Bu barədə AZƏRTAC-a eksklüziv müsahibəsində Ukrayna-Azərbaycan parlamentlərarası dostluq qrupunun həmsədri Valeri Kolyux bildirib.

Onun sözlərinə görə, Azərbaycan sadəcə sarsıdıcı qələbə qazanmadı, həm də özünün nəyə qadir olmasını bütün dünyaya nümayiş etdirdi. Azərbaycan xalqı “ərazi bütövlüyü” anlamının boş sözlər olmadığını sözdə deyil, əməldə sübut etdi. Azərbaycan Silahlı Qüvvələrinin qələbəsinin qeyd-şərtsiz xarakterinin parlaq sübutu odur ki, Azərbaycan işğaldan azad edilmiş ərazilərin böyük hissəsini bir güllə atmadan belə azad edib.

Ukraynalı deputat deyib: “Ən əsası odur ki, Azərbaycan milləti Birinci Qarabağ müharibəsinin faciəsindən özünə gələrək sübut etdi ki, Azərbaycanın minlərlə oğul və qızının ölümü əbəs yerə olmayıb. Azərbaycan Füzuli, Xocavənd, Cəbrayıl, Zəngilan, Qubadlı, Kəlbəcər, Ağdam, Laçın və Şuşaya qayıdıb. Azərbaycan öz evinə qayıdıb. İndi Azərbaycan xalqı işğaldan azad edilmiş ərazilərin bərpası üzərində durmadan çalışır. Bu, çətin və uzun prosesdir. Mən ürəkdən inanıram ki, Qarabağın bağları yenidən çiçəklənəcək və oradan müharibənin nə olduğunu heç vaxt anlamayacaq uşaqların şən gülüşləri eşidiləcək”.

Deputat qeyd edib ki, Azərbaycanın qələbəsinin Cənubi Qafqazdakı vəziyyətə geosiyasi təsirini qısa və yığcam şəkildə dəyərləndirmək çox çətindir. Çünki bu qələbə ani və əsaslı idi. V.Kolyux deyib: “Birincisi, Azərbaycan öz əraziləri üzərində, qərbdə və cənubda dövlət sərhədi üzərində nəzarəti tam bərpa edib. Bu, artıq regionda vəziyyəti tamamilə alt-üst edən və yaxın qonşularla münasibətə müsbət təsir edən mühüm faktdır. İkincisi, Ermənistan sarsıdıcı məğlubiyyətə uğrayaraq, siyasi, sosial və iqtisadi böhranla üzləşib ki, bu da Cənubi Qafqazdakı vəziyyətdə öz əksini tapıb: xarici dövlətlərin bu regiona münasibətlərinin xarakteri dəyişib, yeni maraq dairələri əmələ gəlib. Üçüncüsü, ATƏT-in Minsk qrupu, əslində, fəaliyyətsiz bir quruma çevrilib, çünki regionda status-kvo dəyişib. Dördüncüsü, Azərbaycan Cənubi Qafqazda təhlükəsizliyin dayaqlarından biri, həmçinin Avropa ilə Xəzər regionu arasında əsas iqtisadi körpü kimi əvəzedilməzliyini və mühümlüyünü vurğuladı. Beşincisi, Azərbaycanın qələbəsi həm işğaldan azad edilmiş ərazilərdə (faydalı qazıntıların hasilatı), həm də bir neçə ölkə arasında (logistika, neft və qaz kəmərləri) bir sıra iqtisadi layihələr üçün zəmin və şərait yaratdı”.

Onun sözlərinə görə, bir sıra başqa nəticələrin də adını çəkmək olar. Lakin təkcə yuxarıda sadalananlar belə deməyə əsas verir ki, Cənubi Qafqaz dəyişib və artıq əvvəlki kimi olmayacaq. Azərbaycan bundan əvvəl işğal altında olan bütün əraziləri üzərində nəzarəti praktik olaraq bərpa etməklə Qarabağ məsələsinə nöqtə qoydu. İndi Azərbaycanın ərazi bütövlüyünün bərpası prosesini tamamilə başa çatdırmaq, bununla da Cənubi Qafqazda sabitliyi və təhlükəsizliyi möhkəmlətmək və regiona dayanıqlı inkişaf və tərəqqi təmin edə biləcək bir sıra infrastruktur layihələrinin icrasına keçmək vacibdir. Ukrayna hadisələrin belə cərəyan etməsində çox maraqlıdır, çünki biz təkcə Azərbaycanın ərazi bütövlüyünün bərpasını deyil, həm də iqtisadi və siyasi əlaqələrimizin genişlənməsini tamamilə dəstəkləyirik.

Emil Hüseynli

AZƏRTAC-ın xüsusi müxbiri

Kiyev