MƏDƏNİYYƏT
Ukraynanın populyar “AvtoBiznesTur” jurnalında Azərbaycan haqqında məqalə dərc edilmişdir
Kiyev, 28 sentyabr (AZƏRTAC). Ukraynada çıxan “AvtoBiznesTur” reklam-informasiya jurnalı Dünya Turizm Günü münasibətilə Azərbaycana gözəl hədiyyə etmişdir. Bu populyar nəşrin yenicə çapdan çıxmış nömrəsində “Azərbaycan süjetləri. Qədim xalçaçılıq sənəti” adlı məqalə dərc edilmişdir. Məqalənin müəllifi Lidiya Koltunova Azərbaycanın Kiyevdəki səfirliyinin informasiya dəstəyi ilə ukraynalı oxucu auditoriyasına Odlar Yurdunun qədim tarixi, xalqımızın xalçaçılıq sənəti barədə söhbət açır, antik tarixçilər Herodot və Ksenofontdan sitatlar gətirir. Sonra jurnalist müasir Azərbaycana “qayıdır”, respublikamızın bütün sahələrdə qazandığı uğurlara müraciət edir.
Materialda “Eurovision-2011” mahnı müsabiqəsində Azərbaycan duetinin möhtəşəm qələbəsi, Avropanın gözəl şəhəri olan Bakı, azərbaycanlılara xas olan qonaqpərvərlik, böyüklərə hörmət, zəiflərə kömək, sülhsevərlik və tolerantlıq kimi xüsusiyyətlər barədə məlumat verilir. Əfsanəvi Azərbaycan xalçaçılıq ənənələrinin davam etdirilməsi mövzusu məqalənin ana xəttini təşkil edir. Yeri gəlmişkən, ukraynalı jurnalist bunları başqalarından eşitdiyinə əsasən yazmır. Keçən əsrin 80-ci illərində Lidiyanın nənəsinin Bakıdan gətirdiyi əl xalçası indiyə qədər onun mənzilini bəzəyir. Müəllif haqlı olaraq yazır ki, Azərbaycan xalçaları bu gün də əsl sənət əsərləridir. Onların bənzərsiz naxışları, toxunma üslubu həm də bütün Yaxın və Orta Şərqdə xalçaçılığın inkişafına təkan verir. Təsadüfi deyildir ki, Azərbaycan xalçaları İngiltərə, Fransa, ABŞ, Rusiya və bir sıra başqa ölkələrin muzeylərində saxlanılır. Heydər Əliyev Fondunun Rusiya Federasiyasındakı nümayəndəliyinin rəhbəri, “Baku” jurnalının baş redaktoru Leyla Əliyevanın fotoşəkli məqalənin mətninə çox uğurlu illüstrasiyadır. Londondakı populyar “On Maryleon” qalereyasında çəkilmiş bu şəkildə Leyla xanım qürur hissini gizlətmədən britaniyalı xalça sərraflarını həmin qalereyada saxlanılan Azərbaycan xalçaları ilə tanış edir.
Jurnalın bu nömrəsində “Kitab sərgisi-2011” sərlövhəli informasiyada Azərbaycanın Ukraynadakı səfirliyinin də iştirak etdiyi beynəlxalq kitab sərgi–yarmarkası haqqında söhbət açılır. Ukrayna nəşrinin səhifələrində xarici ölkələrin diplomatik nümayəndəliklərinin bir neçəsinin, o cümlədən Azərbaycan səfirliyinin stendinin fotoşəkli dərc edilmişdir.
Zeynal Ağazadə
AZƏRTAC-ın xüsusi müxbiri
Kiyev