ELM VƏ TƏHSİL
Ulu Öndər Heydər Əliyevin ideyalarını reallığa çevirən Böyük Qayıdış
Bakı, 9 mart, AZƏRTAC
AMEA-nın İctimai Elmlər Bölməsinin Elmi şurasının növbəti iclası keçirilib.
Bu barədə AZƏRTAC-a akademiyadan məlumat verilib. AMEA-nın vitse-prezidenti vəzifəsini icra edən İctimai Elmlər Bölməsinin Elmi şurasının sədri akademik Gövhər Baxşəliyeva iclasın gündəliyini iştirakçılarının diqqətinə çatdırıb.
İclasda AMEA-nın Fəlsəfə və Sosiologiya İnstitutunun aparıcı elmi işçisi, siyasi elmlər üzrə fəlsəfə doktoru, dosent Sənan Həsənovun “Ulu Öndər Heydər Əliyevin ideyalarını reallığa çevirən Böyük Qayıdış” mövzusunda məruzəsi dinlənilib. O, Prezident İlham Əliyevin 2023-cü ilin Azərbaycanda “Heydər Əliyev İli” elan edilməsi haqqında və “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın təsdiq edilməsi haqqında sərəncamları çərçivəsində qarşıya qoyulan vəzifələrdən, hədəflərdən söz açıb. Böyük Qayıdışın tarixi, siyasi mərhələlərinin şərhinə dair dərin elmi təhlillər aparan məruzəçi güclü dövlət konsepsiyasının siyasi varislikdə təzahürü, istiqamətlər və hədəflər, mütərəqqi ideologiya, iqtisadi inkişafın və sabitliyin qarantı kimi, Qələbənin fəlsəfəsində lider amili, Böyük Qayıdışın və yeni reallıqların beynəlxalq siyasi məkanda diplomatik hədəflərini şərh edib.
S.Həsənov güclü dövlət ideyasının reallığa çevrilməsi prosesində ideologiyanın rolundan, eləcə də Heydər Əliyev irsində yeni çağırışların təkamülündə nəzəri biliklər sisteminin praktikada tətbiq istiqamətlərinin dövriyyəyə gətirilməsinin vacibliyini bildirib.
Bu mərhələlər arasındakı mövcud siyasi şəraitdən asılı olmayaraq, Heydər Əliyevin iradəsində xilaskarlıqla Böyük Qayıdışa zəmin yaradan tarix və zaman kontekstindəki vəhdətin müddəaları sistemləşdirdiyini vurğulayıb. Alim müstəqilliyin təməl prinsiplərində ideoloji və siyasi təfəkkürün formalaşması və dahi siyasi xadimin Böyük Qayıdış konsepsiyasında şəxsiyyət və ideologiyanın vəhdəti məsələləri güclü dövlətin formalaşdırılmasına yönələn islahatlar əsasında təhlil edib. Məruzədə bütün bu sistemli strategiyanın nəticəsi kimi güclü dövlət konsepsiyasının siyasi varislikdə təzahürü, istiqamətləri və hədəflərinin Prezident İlham Əliyevin liderlik fəaliyyəti ilə növbəti həlledici mərhələdə davam etdiyini izah edib, mütərəqqi ideologiyanın, iqtisadi inkişafın və sabitliyin Qələbənin fəlsəfəsindəki roluna dair təhlillər aparıb. Bildirib ki, Azərbaycanın yaratdığı reallıqların Böyük Qayıdışla nəticələnməsi, beynəlxalq siyasi məkanda Azərbaycanın qələbəsinin diplomatik hədəfləri Ulu Öndər Heydər Əliyevin ideyalarını reallığa çevirən siyasi praktiki fəaliyyətin istiqamətləri kimi şərh edilə bilər.
Məruzəçi, Prezident İlham Əliyevin beynəlxalq aləmdə hazırkı fəaliyyətinin informasiya məkanındakı qərəzli sədləri sındırdığını və Böyük Qayıdışın bu fəaliyyət kontekstində təmin edilməsinə yönəlmiş addımların Qələbə konsepsiyasındakı yerinə nəzər salıb. Həmçinin Böyük Qayıdış konsepsiyasının baza prinsiplərinin mərhələlərlə həyata keçirilməsi prosesini sistemləşdirməsi, güclü dövlət ideyasının reallığa çevrilməsi prosesində ideologiyanın rolunu müəyyən edən amilləri diqqətə çatdırıb. Ulu Öndər Heydər Əliyevin siyasi irsində yeni çağırışların nəzəri biliklər sistemindən praktikada tətbiq istiqamətlərinə dair qarşıda duran vəzifələrin dövriyyəyə gətirilməsi iclas iştirakçıları tərəfindən maraqla qarşılanıb. Alim çıxışının sonunda mövzu istiqamətində öz konkret təkliflərini irəli sürüb.
Məruzə dinlənildikdən sonra mövzu ətrafında müzakirələr aparılıb, suallar cavablandırılıb.
Məruzə ətrafında çıxış edən AMEA-nın müxbir üzvü Şahbaz Muradov mövzunun aktuallığını diqqətə çatdıraraq, məruzənin mətbuatda çap edilməsinə dair təklif irəli sürüb. Fəlsəfə və Sosiologiya İnstitutunun baş direktoru fəlsəfə elmləri doktoru İlham Məmmədzadə mövzunun hər zaman aktual olduğunu bildirib, məruzəçinin həm siyasi, həm də elmi fəaliyyətini yüksək qiymətləndirib.
İclasda bir sıra elmi-təşkilati və kadr məsələləri də müzakirə olunub. Akademik Gövhər Baxşəliyeva, həmçinin AMEA-nın İctimai Elmlər Bölməsinin müəssisələrində “Elm günü”nə hazırlığın vəziyyəti haqqında söz açıb, əlamətdar günün yüksək səviyyədə qeyd olunması ilə əlaqədar öz tapşırıq və tövsiyələrini verib.
İclasda AMEA-nın Arxeologiya, Etnoqrafiya və Antropologiya İnstitutunun strukturunda qismən dəyişiklik edilməsi haqqında da təkliflər irəli sürülüb.