Bakı, 3 iyun, AZƏRTAC

Xəzər regionunun enerji resursları bir çox dövlətlərin ziddiyyətli maraqlarının mürəkkəb düyününün mərkəzində dayandığı üçün Azərbaycan müstəqilliyin əsas elementi olan iqtisadi müstəqilliyin bünövrəsi üzərində işləmək məcburiyyətində qaldı. Belə çətin, həlledici şəraitdə xalqın çağırışı ilə yenidən ölkəmizə rəhbərlik edən Ulu Öndər Heydər Əliyev ilk gündən “Siyasət və iqtisadiyyat bir-birini tamamlayır” prinsipi və “Neft xalqımızın milli sərvətidir” konsepsiyası ilə Azərbaycanın daxili və xarici siyasətinin vektorlarını müəyyən etdi.

Bu fikirləri AZƏRTAC-a açıqlamasında Gənc Demokratlar İnstitutu İctimai Birliyinin sədri Yeganə Hacıyeva deyib.

Bildirilib ki, ölkədəki sosial-iqtisadi və ictimai-siyasi böhrandan çıxmağın əsas vasitələrindən biri kimi 1994-cü ildə Heydər Əliyev Azərbaycan neftinin işlənməsinin sürətləndirilməsi haqqında Fərman imzaladı. Neft və qaz hasilatının artımı ölkədəki sosial-iqtisadi və ictimai-siyasi böhrandan çıxmağın əsas vasitələrindən biri kimi, həm də ölkəyə xarici kapitalın cəlb edilməsində vacib rol oynadı.

Y.Hacıyeva vurğulayıb ki, Ulu Öndər Heydər Əliyev müəllifi olduğu neft strategiyası ilə Azərbaycanı Xəzər dənizinin nəhəng enerji potensialını ilk mənimsəyən və dünyanın neft mərkəzlərindən birinə çevrilmiş regionun inkişafı üçün keyfiyyətcə yeni iqtisadi model formalaşdıran dövlətə çevirdi. Bu, Azərbaycan dövlətinin milli təhlükəsizliyinin vacib elementi olan addım idi, çünki dövlətin iqtisadi təhlükəsizliyi onun milli təhlükəsizliyinin tərkib hissəsidir. Dövlətin milli təhlükəsizliyinin vəziyyətini və ya səviyyəsini müəyyən edən iqtisadi, siyasi, hərbi, elmi, texnoloji və sosial aspektlər və onlara bağlı amillər birbaşa iqtisadi təhlükəsizlikdən asılıdır: “Azərbaycanın iqtisadi inkişaf modeli təcrübəsi göstərdi ki, iqtisadi təhlükəsizliyin təmin edilməsi ölkənin müstəqilliyinin zəmanətinə, sosial rifahın təmin olunması ilə həm də sabitliyə, cəmiyyətin səmərəli inkişafı ilə dövlətin möhkəmlənməsinə xidmət edir.

Müstəqilliyin ilk illərində əsası qoyulan, daha çox maliyyə-iqtisadi müstəqillik kimi xarakterizə olunan bu iqtisadi inkişaf modeli Azərbaycan iqtisadiyyatının qlobal səviyyədə rəqabət qabiliyyətinin artırması ilə nəticələndi. Nəzərə alsaq ki, müasir dünya iqtisadiyyatı çoxlu sayda amillərə malik vahid qlobal maliyyə bazarıdır, onda milli iqtisadi modellərin qlobal iqtisadiyyatın inteqrasiyası üçün rəqabət qabiliyyətliliyi həlledici faktorlardan biri kimi özünü göstərir”.

Y.Hacıyeva, həmçinin qeyd edib ki, əsası Heydər Əliyev tərəfindən qoyulmuş bu rəqabətqabiliyyətli iqtisadi model, müstəqilliyin ilkin illərində ölkənin iqtisadi sahədə milli maraqlarını, ölkənin daxili iqtisadi ehtiyaclarının müəyyən edilməsi və ödənilməsi kimi strateji milli prioritetlərini formalaşdırması ilə paralel regional və qlobal iqtisadi sistemə inteqrasiya imkanlarının hesablanması ilə qurulub. Bu modelin formalaşmasında isə Azərbaycanın iqtisadi təhlükəsizliyi, iqtisadi müstəqilliyi və iqtisadi sahədə milli maraqların uzlaşması ilə həyata keçirilib.