REGİONLAR
Ulu Öndərimiz ana dilimizin qorunması və inkişafında müstəsna xidmətlər göstərib
Naxçıvan, 19 fevral, AZƏRTAC
“Xalqı xalq edən, milləti millət edən onun ana dilidir” - deyən ümummilli lider Heydər Əliyev sovet dövründə, o cümlədən müstəqillik illərində ana dilimizin qorunması və inkişafında müstəsna xidmətlər göstərib.
“Naxçıvan” Universitetinin mətbuat xidmətindən AZƏRTAC-ın Naxçıvan bürosuna bildirilib ki, bu barədə ali təhsil ocağının Azərbaycan dili və ədəbiyyatı kafedrasının təşkilatçılığı ilə keçirilən elmi konfransda bəhs olunub.
21 fevral - Beynəlxalq Ana Dili Gününə həsr edilən konfransda universitetin rektoru, filologiya üzrə fəlsəfə doktoru, dosent Nurlana Əliyeva çıxış edərək Azərbaycan dilinin keçdiyi inkişaf yollarından, dilin xalq, millət üçün əhəmiyyətindən danışıb. Bildirib ki, ümummilli lider Heydər Əliyev ana dilimizin inkişafına daim böyük əhəmiyyət verib. Ulu Öndərimiz hələ 1969-cu ildə Bakı Dövlət Universitetinin 50 illik yubileyində ilk dəfə SSRİ miqyasında yüksəkvəzifəli şəxs kimi rus dilində deyil, öz ana dilində çıxış edib. Bu, həmin dövr üçün çox böyük bir hadisə idi və geniş müzakirəyə səbəb olmuşdu. Həmçinin məhz Ulu Öndərimizin iradəsi nəticəsində Azərbaycan SSR-in 1978-ci ildə qəbul olunmuş Konstitusiyasında Azərbaycan dilinə dövlət dili statusu verilib. Rektor dahi şəxsiyyətin rəhbərliyi altında hazırlanmış müstəqil Azərbaycan Respublikası Konstitusiyasının 21-ci maddəsində dövlət dilinin Azərbaycan dili kimi təsbit edildiyini, o cümlədən 2002-ci il sentyabrın 30-da “Azərbaycan Respublikasında dövlət dili haqqında” Qanunun qəbul olunduğunu diqqətə çatdırıb.
Daha sonra Azərbaycan dilinin inkişaf dövrlərindən bəhs edən slayd nümayiş etdirilib.
Konfransda Azərbaycan dili və ədəbiyyatı kafedrasının professoru Sədaqət Həsənova “Çağdaş Azərbaycan dilinin aktual problemləri”, dosent Qənirə Əsgərova isə “Dilimizə dövlət qayğısı” mövzularında çıxış ediblər. Məruzəçilər bildiriblər ki, dil yarandığı, mövcud olduğu andan daim inkişafdadır. Ana dilinə xarici dillərdən yeni sözlərin gəlməsi, eyni zamanda, bir dildən başqa dillərə sözlərin keçməsi onun inkişaf dinamikasına, geniş yayılmasına müsbət təsir göstərən amillərdir. Lakin ana dilində alınma sözlərə üstünlüyün verilməsi yolverilməz haldır.
Vurğulanıb ki, Ulu Öndərimizin siyasi xəttini uğurla davam etdirən Prezident İlham Əliyev bu sahəyə xüsusi diqqət yetirir. Dövlət başçısı “Azərbaycan dilində latın qrafikası ilə kütləvi nəşrlərin həyata keçirilməsi haqqında“ 2004-cü il 12 yanvar tarixli Sərəncam imzalayaraq, klassik və müasir Azərbaycan və dünya ədəbiyyatı incilərinin latın qrafikası ilə yenidən nəşrinə başlanmasının əsasını qoyub. Bu, dilimizin inkişafında mühüm rol oynayan addımlardan sadəcə biridir. Dövlətimizin başçısı 2012–ci il 23 may tarixli Sərəncamı ilə “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nı təsdiq etməklə Azərbaycan dilinin qorunması və inkişafı ilə bağlı istiqamətləri müəyyənləşdirmiş oldu.
Konfransın sonunda universitetin ictimai həyatında fəal iştirak edən tələbələrə üzərində “Naxçıvan” Universitetinin rəmzi olan hədiyyələr verilib.