REGİONLAR
Ulu Öndərin Milli Kitabxanaya hədiyyə etdiyi şəxsi kitabları Tərtərdə sərgilənib VİDEO
Tərtər, 19 aprel, Tahir Ağaməmmədov, AZƏRTAC
Tərtər şəhərində ümummilli lider Heydər Əliyevin anadan olmasının 93-cü ildönümünə həsr olunmuş “Ulu öndər Heydər Əliyevin Azərbaycan Milli Kitabxanasına hədiyyə etdiyi şəxsi kitabları” mövzusunda sərgi-konfrans keçirilib.
AZƏRTAC xəbər verir ki, Mədəniyyət və Turizm Nazirliyi, Tərtər Rayon İcra Hakimiyyəti və M.F.Axundzadə adına Azərbaycan Milli Kitabxanasının birgə təşkilatçılığı ilə keçirilən konfransın iştirakçıları əvvəlcə ümummilli lider Heydər Əliyevin Tərtər şəhərinin mərkəzi meydanındakı abidəsi önünə tər çiçək dəstələri düzərək, xatirəsinə ehtiramlarını bildiriblər. Sonra Gənclər Mərkəzinin foyesində ulu öndər Heydər Əliyevin Azərbaycan Milli Kitabxanasına hədiyyə etdiyi şəxsi kitablardan ibarət sərgiyə baxış keçirilib.
Konfransın əvvəlində Ulu Öndərin 1995-ci il iyunun 3-də Milli Kitabxanada çıxışına dair videoçarx nümayiş etdirilib. Tərtər Rayon İcra Hakimiyyətinin başçısı Müstəqim Məmmədov ümummilli lider Heydər Əliyevin Azərbaycan mədəniyyətinin inkişafındakı misilsiz xidmətlərindən, ölkəmizdə kitabxana sahəsinin inkişafına göstərdiyi diqqət və qayğıdan danışıb. Bildirib ki, Azərbaycan Milli Kitabxanası Ümummilli Liderin hakimiyyəti illərində öz inkişafının yüksək pilləsinə qədəm qoyub. 1996-cı ildə “Azərbaycan Respublikasında kitabxana işinin vəziyyəti və onun yaxşılaşdırılması haqqında”, 1998-ci ildə “Kitabxana işi haqqında” Azərbaycan Respublikasının Qanunu qəbul edilib. Bütün bunlar ölkəmizdə kitabxana işinin təkmilləşdirilməsinə, kitab nəşrinin və kitabxanaların inkişafına ciddi təkan verib.
M.Məmmədov Ulu Öndərin “Kitabxana xalq, millət üçün, cəmiyyət üçün müqəddəs bir yer, mənəviyyat, bilik və zəka mənbəyidir” sözlərini xatırladaraq qeyd edib ki, dahi rəhbərin siyasi kursu Prezident İlham Əliyev tərəfindən uğurla davam etdirilir. Bu diqqət və qayğı sayəsində ölkədə kitabxanaçılıq inkişaf etdirilir, kitabxanaların maddi-texniki bazası yaxşılaşdırılır, kitab fondu latın qrafikası ilə çap olunmuş ədəbiyyatlarla zənginləşdirilir.
Tədbirdə çıxış edən Azərbaycan Milli Kitabxanasının direktoru Kərim Tahirov bildirib ki, ulu öndər Heydər Əliyevin Azərbaycan Milli Kitabxanasına hədiyyə etdiyi şəxsi kitabların ilk dəfədir regionlarda sərgisi keçirilir.
K.Tahirov Ulu Öndərin Milli Kitabxanada 4 dəfə olduğunu deyərək, 1995-ci ildə kitabxanadakı çıxışını xatırladıb. “Mən indi kitabxanaya xeyli kitab bağışladım. Güman edirəm ki, bunlar fondda öz yerini tutacaqdır. Zənnimcə, gələcəkdə bu təşəbbüs davam edə bilər” – deyən Ümummilli Liderimizin nəcib təşəbbüsündən sonra görkəmli alimlərimiz və ziyalılarımız Milli Kitabxanaya öz şəxsi kitabxanalarından xeyli kitab bağışladılar. Bu isə Milli Kitabxananın fondunun daha da zənginləşməsinə kömək etdi.
Diqqətə çatdırıb ki, Ulu Öndərin ideyalarını davam etdirən Prezident İlham Əliyevin diqqət və qayğısı nəticəsində Azərbaycan Milli Kitabxanası dünyanın ən müasir, inkişaf etmiş kitabxanalarından birinə çevrilib.
Tədbirdə Bakı Dövlət Universitetinin kitabşünaslıq və nəşriyyatı işi kafedrasının dosenti, fəlsəfə doktoru Rasim Süleymanovun “Ulu öndər Heydər Əliyev və Azərbaycanın kitab mədəniyyəti” məruzəsi dinlənilib.
Tərtər rayon mərkəzləşdirilmiş kitabxana sisteminin direktoru İlduzə Qurbanova, Heydər Əliyev Mərkəzinin direktoru Səlimə Yusifova və başqaları ümummilli lider Heydər Əliyevin Azərbaycanın inkişafında, müstəqilliyimizin möhkəmləndirilməsində əvəzsiz xidmətlərindən, ölkəmizdə kitabxana sisteminin inkişafına göstərilən dövlət qayğısından bəhs ediblər.