Daşkəsən, 6 may, Rauf Hacıyev, AZƏRTAC

Daşkəsəndə ümummilli lider Heydər Əliyevin anadan olmasının 94-cü ildönümü münasibətilə keçirilən tədbirdə rayon sakinləri bir daha Ulu Öndərə olan sonsuz məhəbbətlərini nümayiş etdiriblər.

AZƏRTAC xəbər verir ki, ümumrayon tədbirində Daşkəsən Rayon İcra Hakimiyyətinin başçısı Əhəd Abıyev, Prezident Administrasiyasının məsul işçisi Qafar Əliyev, rayonda fəaliyyət göstərən idarə, təşkilat və müəssisələrin təmsilçiləri, həmçinin ictimaiyyət nümayəndələri iştirak ediblər.

Əvvəlcə tədbir iştirakçıları ümummilli lider Heydər Əliyevin rayon mərkəzindəki abidəsini ziyarət edib, önünə əklil və gül dəstələri qoyublar.

Sonra Heydər Əliyev Mərkəzində Ulu Öndərin həyat və siyasi fəaliyyətini əks etdirən eksponatlara baxış olub.

Tədbiri açan Daşkəsən Rayon İcra Hakimiyyətinin başçısı Əhəd Abıyev qeyd edib ki, Heydər Əliyev Azərbaycan tarixində özünəməxsus yer tutan nadir tarixi şəxsiyyətlərdəndir. Onun zəngin irsi hələ uzun müddət siyasətşünasların, filosofların, tarixçi və araşdırmaçıların tədqiqat mənbəyi olacaq. Ümummilli lider Heydər Əliyev 14 ildir aramızda olmasa da, onun ideyaları, siyasi irsi, yaratdığı dövlətçilik məktəbi, bizə ərməğan etdiyi müstəqil və demokratik Azərbaycan inkişaf edir, yeni-yeni uğurlar qazanır.

Prezident Administrasiyasının məsul işçisi Qafar Əliyev çıxışında bildirib ki, Heydər Əliyev tərəfindən təməli qoyulan dövlət müstəqilliyinin möhkəmlənməsinə xidmət edən siyasi və iqtisadi inkişaf konsepsiyasını Prezident İlham Əliyev yeni geosiyasi şəraitdə uğurla davam etdirir. Dövlətimizin başçısının tapşırığı ilə ölkənin bütün sahələrində milli konsepsiya hazırlanaraq qəbul edilib. Bu istiqamətdə lazımi hüquqi baza yaradılıb, texniki təchizat və kadr hazırlığı işi dövrün yeni tələblərinə uyğun qurulub.

Anım mərasimində Heydər Əliyevə həsr olunan film nümayiş etdirilib.