Bakı, 12 dekabr, AZƏRTAC 

Binəqədi Rayon İcra Hakimiyyətində ümummilli lider Heydər Əliyevin xatirəsini anma günü ilə əlaqədar keçirilən tədbirdə

dahi şəxsiyyətin şərəfli həyat yolu və zəngin siyasi fəaliyyətindən danışılıb.

Mərasimdə çıxış edən Bakı Şəhəri üzrə Təhsil İdarəsinin rəis müavini Hüseyn Əsgərov Ümummilli Liderin xalqımız və dövlətimiz üçün göstərdiyi xidmətlərdən, xüsusilə təhsilin inkişafı, gənc nəslin sağlam ruhda tərbiyə olunması istiqamətində gördüyü işlərdən danışıb. O, Ulu Öndərin həyatının, fəaliyyətinin hər məqamının örnək olduğunu diqqətə çatdırıb.

Milli Məclisin deputatı Rafael Cəbrayılov dövlət quruculuğu sahəsində Ümummilli Liderin reallaşdırdığı və nəticələrindən bu gün də bəhrələndiyimiz böyük işləri diqqətə çatdırıb.

Binəqədi Rayon İcra Hakimiyyətinin başçısı Xaləddin İsgəndərov Ulu Öndərin zaman və məkan anlayışına sığmayaraq öz xalqının təkcə sevimlisinə deyil, həm də idealına çevrildiyini bildirib. O, zamanın çətin sınaqları ilə üzləşən Azərbaycanı parçalanmadan, xaosdan xilas edib inkişaf mərhələsinə çatdıran Heydər Əliyevin yalnız bir zamana sığmayan milli və milli olduğu qədər də bəşəri şəxsiyyət olduğunu bildirib. Qeyd edilib ki, Azərbaycanın bugünkü inkişafı, regionun lider dövlətinə çevrilməsi və dünyada öz mövqeyi ilə seçilməsi Ulu Öndərin daha böyük xidmətindən danışmağa əsas verir. Bu xidmət Ulu Öndərin uzaqgörənliyi, xarizmatikliyi və digər liderlik keyfiyyətləri ilə seçilən və ən əsası özü qədər inandığı Prezident İlham Əliyevi Azərbaycana bəxş etməsidir.

Bədii hissə ilə davam edən tədbirdə xalq artisti İlham Əsgərovun ifasında Ümummilli Liderə həsr olunmuş və onun sevdiyi şeirlərdən ibarət bədii kompozisiya təqdim edilib.

Mərasim “Liderlik missiyası” adlı videoçarxın nümayişi ilə yekunlaşıb.