Bakı, 10 dekabr, AZƏRTAC

Dekabrın 10-da Azərbaycan Dövlət Pedaqoji Universitetində (ADPU) ümummilli lider Heydər Əliyevin anım mərasimi keçirilib.

ADPU-dan AZƏRTAC-a bildirilib ki, əvvəlcə tədbir iştirakçıları Fəxri xiyabanda xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini yad edib, məzarı önünə əklil qoyublar.

Görkəmli oftalmoloq-alim, akademik Zərifə xanım Əliyevanın da xatirəsi anılıb, məzarı üzərinə tər güllər düzülüb.

ADPU-nun rektoru, professor Cəfər Cəfərov çıxışında bildirib ki, xalqımızın böyük oğlu, ulu öndər Heydər Əliyevin vəfatından 15 il keçir. Heydər Əliyev Azərbaycanı çətinlik girdabından xilas edib, müstəqil dövlətimizi qurub, gücləndirib, inkişaf perspektivlərini müəyyənləşdirib və beynəlxalq miqyasda layiqincə tanıdıb. Ulu Öndərin ən böyük xidmətlərindən biri Azərbaycanı öz layiqli siyasi varisi İlham Əliyevə həvalə etməsidir. Bugünkü müstəqil, qüdrətli, sürətlə inkişaf edən, regionun lider dövlətinə çevrilən Azərbaycan ulu öndər Heydər Əliyevin şah əsəridir. Prezident İlham Əliyevin rəhbərliyi altında ölkəmiz həyatımızın bütün sahələrində böyük uğurlar qazanır.

Qeyd olunub ki, Heydər Əliyev elm və təhsil sahəsində köklü və əsaslı dəyişikliklərin həyata keçirilməsini təmin edib, istedadlı gənclərimizi keçmiş SSRİ-də tanıdıb və onların nüfuzlu ali təhsil müəssisələrində təhsil almaları üçün səmərəli və məqsədyönlü fəaliyyət göstərib. Bu siyasəti müasir dövrümüzdə Prezident İlham Əliyev uğurla davam etdirir. Dövlət başçısının 2018-ci il 16 noyabr tarixli Sərəncamı ilə təsdiq edilmiş “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” ali təhsil sisteminin yeni və müasir inkişaf istiqamətlərinin, strateji hədəflərinin müəyyən edilməsi baxımından böyük əhəmiyyət kəsb edir. Bu proqramın həyata keçirilməsi təhsilalanlara həm işlə təmin olunmaq, həm də təhsildə fasiləsizlik prinsipini gerçəkləşdirmək baxımından əlavə imkanlar yaradacaq. Həmçinin ikili diplomlar, xaricdə doktorantura təhsili ali təhsil sisteminin beynəlxalq standartlara uyğunlaşdırılması, universitetlərin rəqabət qabiliyyətinin artırılması, ali təhsil müəssisələrinin Avropa məkanına daxil olması, universitetlərdə infrastrukturun və idarəetmənin daha səmərəli qurulması, Bolonya prosesindən irəli gələn dəyişikliklərin təcrübədə qavranılması, insan kapitalının inkişaf etdirilməsi, strateji əhəmiyyət kəsb edən sahələr üzrə yüksəkixtisaslı milli kadrların hazırlanması baxımından da çox faydalı olacaq.

Tarix üzrə fəlsəfə doktoru Taleh Cəfərov “Heydər Əliyevin siyasi portretinin cizgiləri” mövzusunda məruzə edib. O, Heydər Əliyevin liderlik xüsusiyyətlərindən, xalqına, millətinə, Vətəninə məhəbbətindən, elm və təhsilə xüsusi diqqət və qayğı göstərməsindən, yüksək intellektual səviyyəyə malik gənc nəslin yetişdirilməsi üçün həyata keçirdiyi gənclər siyasətindən danışıb.

Nərimanov Rayon İcra Hakimiyyəti başçısının müavini İradə Mahmudova, Yeni Azərbaycan Partıyasının (YAP) Nərimanov rayon təşkilatının sədri Təmraz Tağıyev, YAP-ın təsis konfransının iştirakçısı və Naxçıvanda YAP-ın Qadınlar Şurasının sədri olmuş Südabə Qəhrəmanova çıxış edərək ulu öndər Heydər Əliyevin xalqımız və dövlətimiz qarşısında göstərdiyi tarixi xidmətləri ilə bağlı fikirlərini bölüşüblər.

Mərasimdə tarix və coğrafiya fakültəsinin tələbələrinin Xalq şairi Zəlimxan Yaqubun “Böyük ömrün dastanı” poeması əsasında hazırladıqları bədii-musiqili kompozisiya təqdim olunub.

Daha sonra məktəbəqədər təhsil, psixoloji xidmət və korreksiyaedici təlim fakültəsinin tələbələrinin ulu öndər Heydər Əliyevin həyat və fəaliyyəti ilə bağlı hazırladıqları videoçarx nümayiş olunub, xor kollektivinin ifasında “Ulu Öndər” mahnısı səsləndirilib.