CƏMİYYƏT


Ulu öndər Heydər Əliyevin Azərbaycanın dünyada söz və nüfuz sahibi olan ölkəyə çevrilməsində əvəzsiz töhfələri vardır

Bakı, 12 may, AZƏRTAC

Ali Baş Komandan İlham Əliyevin rəhbərliyi ilə qəhrəman Azərbaycan Ordusunun təcavüzkar Ermənistanın işğalı altında olan torpaqlarımızı 44 gün davam edən Vətən müharibəsində azad etməsi, eyni zamanda, Qarabağda, Şərqi Zəngəzurda bu gün həyata keçirilən tikinti-quruculuq işləri hər birimizi qürurlandırır. Azərbaycanın 30 ilə yaxın erməni işğalında qalmış yurd yerlərinin əsl sakinlərinin qarşılanması üçün hazırlıq işləri görülür.

Bu sözləri AZƏRTAC-a açıqlamasında siyasi ekspert Aydan Qurbanova söyləyib.

O qeyd edib ki, Azərbaycan xalqının mənəvi dəyərlərini, tarixi kimliyini, milli özünəməxsusluğunu qoruyub saxlayan, həmçinin gələcək nəsillərə ötürməyi bacaran ulu öndər Heydər Əliyev daim təhsilin, elmin, milli-mənəvi dəyərlərin böyük qoruyucusu olub. Məhz ona görə də Heydər Əliyev Fondu bu istiqamətdə məqsədyönlü fəaliyyəti ilə hər zaman bu amala sadiqliyini nümayiş etdirir. Sözsüz ki, əldə olunan uğurlarda Fondun prezidenti, Azərbaycanın birinci xanımı, UNESCO-nun və ICESCO-nun xoşməramlı səfiri Mehriban xanım Əliyevanın çoxşaxəli fəaliyyəti mühüm əhəmiyyət kəsb edir.

Aydan Qurbanovanın sözlərinə görə, Heydər Əliyev Fondunun Qarabağın dirçəlişi istiqamətində fəaliyyəti, Şuşada Mehmandarovlar malikanə kompleksinin bərpası zəngin dünyəvi dəyərə malik maddi və mənəvi irsimiz olan Azərbaycanın tarixi sərvətinə, bəşəri irsə verdiyi ən böyük töhfəsidir. Heydər Əliyev Fondu mədəni-mənəvi dəyərlərimizin tanıdılması, Azərbaycanın həqiqətlərinin dünyada qiymətləndirilməsi yönündə əvəzsiz fəaliyyət göstərir.

“Azərbaycanın mədəniyyət paytaxtında - Şuşada Heydər Əliyev Fondunun təşkilatçılığı ilə artıq ikinci ildir “Xarıbülbül” musiqi festivalının keçirilməsi, Vətən oğullarının qanı ilə alınan torpaqda, Cıdır düzündə bir-birindən gözəl musiqi sədalarının, illərdir ürəkağrısı ilə dinlədiyimiz “Qarabağ” şikəstəsinin səsləndirilməsi qəlbimizə su səpib, bizə qürur hissi yaşadır.

Şuşa şəhərinin erməni işğalı altında olduğu müddətdə onların vandallığı, vəhşiliyi nəticəsində dini dəyərlərimizdən sayılan məscidlərimizin dağıdılması nəinki Azərbaycan xalqı, bütün müsəlman aləmi üçün təhqir idi. Aşağı Gövhər ağa, Yuxarı Gövhər ağa və Saatlı məscidlərinin təmir edilməsi Heydər Əliyev Fondunun Azərbaycanın milli-mənəvi dəyərlərinin qorunmasına növbəti töhfəsidir”, - deyə A.Qurbanova vurğulayıb.

O qeyd edib ki, xalqımızın ümummilli lideri, dahi şəxsiyyət, müasir müstəqil Azərbaycanın banisi Heydər Əliyevin anadan olmasının 99-cu ildönümü ilə əlaqədar olaraq mayın 10-da Prezident İlham Əliyev və birinci xanım Mehriban Əliyeva işğaldan azad olunan torpaqlara - Şuşaya və Füzuliyə səfər ediblər. Səfər çərçivəsində dövlətimizin başçısı və birinci xanım qədim mədəniyyət və memarlıq abidələri ilə zəngin Şuşada Şirin su hamamında, tarzən, bəstəkar və Azərbaycan tarını təkmilləşdirən sənətkar Sadıqcanın evində, Mehmandarovlar malikanə kompleksində aparılan bərpa işləri ilə tanış oldular.

Əfsuslar olsun ki, ulu öndər Heydər Əliyev bu günləri görə bilmədi, ancaq onun ruhu indi şaddır. Ümummilli Liderin dövlətimiz və xalqımız üçün göstərdiyi müstəsna xidmətləri, Azərbaycanın dünyada söz və nüfuz sahibi olan ölkəyə çevrilməsində və ən əsası torpaqlarımızın işğaldan azad olunması yönündə əvəzsiz töhfələri vardır. Ulu Öndərin sona çatdıra bilmədiyi, Azərbaycanın taleyüklü məsələlərini əmanət etdiyi, özü qədər arxalanıb inandığı varisi, böyük sərkərdə Ali Baş Komandan İlham Əliyevin güclü siyasəti nəticəsində qovuşduğumuz Qarabağ bu gün yenidən çiçəklənir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.