SİYASƏT
Ulu öndər Heydər Əliyevin həyatı və siyasi fəaliyyəti çoxəsrlik dövlətçilik tariximizə qızıl hərflərlə yazılıb
Bakı, 5 may, AZƏRTAC
Şuşa Rayon İcra Hakimiyyəti Yeni Azərbaycan Partiyası Şuşa rayon təşkilatı ilə birgə ümummilli lider Heydər Əliyevin adan olmasının 95 illiyi münasibətilə tədbir keçirib. Bu barədə AZƏRTAC-a rayon icra hakimiyyətindən məlumat verilib.
Şuşa Rayon İcra Hakimiyyətinin başçısı, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin İdarə Heyətinin sədri - icmanın rəhbəri Bayram Səfərov ulu öndər Heydər Əliyevin keçdiyi şərəfli həyat yolu və fəaliyyəti barədə məlumat verib. Bildirib ki, ölkəmizdə sabitliyin qorunmasında, hüquqi dövlətin qurulmasında, dövlətçiliyin və iqtisadiyyatın möhkəmləndirilməsində, 1990-cı illərdə erməni təcavüzünün qarşısının alınmasında, doğma Azərbaycanımızın beynəlxalq miqyasda tanınmasında Ulu Öndərin xidmətləri əvəzsizdir. Ermənistanın təcavüzü nəticəsində öz doğma yurd-yuvasından didərgin düşmüş qaçqınların və məcburi köçkünlərin sosial müdafiəsi daim Ümummilli Liderin diqqət mərkəzində olub. Ulu öndər Heydər Əliyevin həyatı və siyasi fəaliyyəti çoxəsrlik dövlətçilik tariximizə qızıl hərflərlə yazılıb.
Tədbirdə Ulu Öndərin şərəfli həyat yolu ilə bağlı sənədli film nümayiş etdirilib.
Yeni Azərbaycan Partiyası Şuşa rayon təşkilatının sədri Təvəkkül Əliyev Ümummilli Liderin hakimiyyətə qayıtdıqdan sonra atəşkəsə nail olunmasında, dünyanın aparıcı ölkələri ilə neft strategiyasının əsasını qoyan “Əsrin müqaviləsi”nin imzalanmasında, ölkəmizin beynəlxalq aləmdə nüfuzunun artmasında, müstəqil dövlətin ilk Konstitusiyasının qəbul olunmasında, 1992-ci ildə YAP-ın yaranmasında Heydər Əliyevin müstəsna xidmətlərindən danışıb.
Deputat Elman Məmmədov, Şuşa Rayon İcra Hakimiyyəti başçısının müavinləri Vüsalə Fətəliyeva və Əkbər Hacıyev, Azərbaycan Respublikasının Prezidenti yanında Dövlət İdarəçilik Akademiyasının professoru, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin Əlaqələndirmə Şurasının sədri Elçin Əhmədov, Şuşa Humanitar Kollecinin gənclər təşkilatının üzvü Şəms Qəhrəmanova Ümummilli Liderin fəaliyyəti dövründə ölkəmizin dinamik inkişafından, onun xalqın rifahı üçün yorulmadan çalışmasından danışıb, müstəqillik illərində Azərbaycanın beynəlxalq aləmdə tanınmasında və yüksək mövqe qazanmasında əvəzsiz rolunu qeyd ediblər.
Sonra Şuşa Dövlət Musiqili Dram Teatrının aktyorlarının ifasında ulu öndər Heydər Əliyevə həsr olunmuş ədəbi-bədii kompozisiya nümayiş etdirilib. Tələbə və şagirdlərin ifasında Ulu Öndərə həsr edilmiş şeirlər və mahnılar maraqla qarşılanıb.
Daha sonra təhsildə və idmanda uğur qazanan rayon məktəbliləri diplomlarla və hədiyyələrlə təltif ediliblər.
Tədbirin sonunda bir qrup gəncə YAP-ın vəsiqələri təqdim olunub.