CƏMİYYƏT
Ulu öndər Heydər Əliyevin xatirəsi Pirallahı rayonunda da anılıb
Bakı, 7 may, AZƏRTAC
Yeni Azərbaycan Partiyası Pirallahı rayon təşkilatı 231 nömrəli tam orta məktəbdə ümummilli lider Heydər Əliyevin anadan olmasının 99-cu ildönümünə həsr olunmuş tədbir keçirilib.
AZƏRTAC xəbər verir ki, tədbirdə YAP Pirallahı rayon təşkilatının sədr müavini Məcid Əhmədov, məsul əməkdaşı Vüqar Nəsirov, məktəbin kollektiv və şagird heyəti iştirak edib.
Tədbiri giriş sözü ilə açan 231 nömrəli tam orta məktəbin direktoru Seymur Yusibov bildirib ki, Azərbaycan xalqının ümummilli lideri Heydər Əliyev müasir dünya tarixinə parlaq və silinməz iz qoymuş böyük şəxsiyyət, qeyri-adi zəka, fitri istedad sahibi, müdrik dövlət xadimi kimi düşüb. Azərbaycanın 1960-cı illərin sonundan başlanan və XXI əsrə adlayan tarixinin otuz beş illik bir dövrü ulu öndər Heydər Əliyevin adı ilə bağlıdır.
Sonra çıxış edən YAP Pirallahı rayon təşkilatının sədr müavini Məcid Əhmədov dünya şöhrətli ictimai-siyasi xadim Heydər Əliyevin Azərbaycanın dövlətçilik tarixində göstərdiyi əvəzsiz xidmətləri diqqətə çatdıraraq, onun öz xalqını ən çətin vəziyyətlərdən çıxardığını, düzgün yol göstərdiyini, taleyüklü məsələlərin həllində daim müdrik rəhbər kimi çıxış etdiyini bildirib. Vurğulayıb ki, müstəsna xidmətləri ilə əbədilik qazanan ümummilli lider Heydər Əliyevin mənalı həyat yolu, zəngin və çoxşaxəli irsi tükənməz təcrübə məktəbidir.
YAP Pirallahı rayon təşkilatının məsul əməkdaşı Vüqar Nəsirov qeyd edib ki, Ulu Öndərin Azərbaycan qarşısında ən böyük xidmətlərindən biri də müasir müstəqil dövlətimizin yaradılması və inkişaf etdirilməsi olub.
Tədbirin bədii hissəsində məktəbin şagirdlərinin təqdimatında Ulu Öndərin həyat və yaradıcılığı haqqında müxtəlif şeirlər, mahnılar, rəqs kompozisiyaları təqdim olunub.