CƏMİYYƏT
Ülvi Mehdiyev: Xüsusi karantin rejimi dövründə icazələrin alınması sistemində bir sıra yeniliklər edilib
Bakı, 3 iyul, AZƏRTAC
Xüsusi Karantin Rejiminin Tətbiqi Zamanı İcazələrin Alınması və Monitorinqi Sistemində bir sıra yeniliklər tətbiq edilib. Belə ki, 8103 SMS icazə sistemi üzərindən müvafiq kodlar üzrə icazə alarkən cavab mesajında şəxsiyyət vəsiqəsinin seriya və nömrəsi də əks olunur. Bu, eyni nömrədən müxtəlif vəsiqə üzrə icazə alan vətəndaşlar arasında çaşqınlıq hallarının yaranmaması, hansı vəsiqə üzrə icazənin verildiyinin dəqiq müəyyən edilməsi məqsədini daşıyır.
AZƏRTAC xəbər verir ki, bu barədə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev Nazirlər Kabineti yanında Operativ Qərargahın iyulun 3-də keçirilən brifinqində bildirib.
Ülvi Mehdiyev qeyd edib ki, “icaze.e-gov.az portalında isə iyulun 5-dək olan icazələr avtomatik deaktiv ediləcək. Fəaliyyətinə Nazirlər Kabinetinin müvafiq qərarı ilə icazə verilən sahələr üzrə çalışan əməkdaşların isə iyulun 20-dək icazələrini işəgötürənlər özləri nəzərdə tutduqları qrafikə uyğun bu gündən aktivləşdirə biləcəklər.
Bundan başqa, fəaliyyətinə icazə verilmiş sahələrdə çalışan əməkdaşların ezamiyyələrinin icazə.e-gov.az portalına əlavə olunması imkanı yaradılıb. Bunun üçün qurumun möhür səlahiyyətli şəxsi icazə.e-gov.az portalında “İcazələr” bölməsinə daxil olur. Açılmış bölmədə “Əməliyyatlar” sütunundan “ezamiyyə et” düyməsinə klik edilərək müvafiq məlumatlar doldurulur və təsdiqlənir. Əgər əməkdaşın aktiv icazəsi yoxdursa, bu zaman “İcazələr” bölməsinə daxil olub “Yeni” düyməsinə klik edərək öncə əməkdaşa icazə almaq lazımdır”, - deyə agentliyin sədri bildirib.