CƏMİYYƏT
Ulyanovskda ümummilli lider Heydər Əliyevin xatirəsi anılıb
Bakı, 13 dekabr, AZƏRTAC
Azərbaycan xalqının ümummilli lideri Heydər Əliyevin əziz xatirəsi Rusiyanın bir çox şəhərlərində ehtiramla anılır. Azərbaycan diasporunun üzvləri Volqaboyu regionunda yerləşən Ulyanovsk şəhərindəki Heydər Əliyev meydanı və 2009-cu ildə burada ucaldılmış Ulu Öndərin abidəsini tez-tez ziyarət edirlər.
AZƏRTAC xəbər verir ki, Ümummilli Liderin vəfatı günündə Ulyanovsk Regional Milli-Mədəni Muxtariyyətinin (URANKA) fəalları, regional və bələdiyyə orqanlarının təmsilçiləri, şəhər dumasının deputatları, digər milli icmaların rəhbərləri, Ulu Öndərin adını daşıyan 78 nömrəli orta məktəbin müəllim və şagirdləri abidənin önünə toplaşıblar.
Tədbiri açan URANKA-nın sədri İslam Hüseynov qeyd edib ki, xalqımızın müasir tarixini, həmçinin dünya tarixini Heydər Əliyevsiz təsəvvür etmək mümkün deyil. “Mübaliğəsiz demək olar ki, Heydər Əliyev Allahın ölkəmizə bir lütfüdür. URANKA-nın sədri vurğulayıb: O, lazımi anda öz siyasi iradəsini, bütün güclü potensialını Azərbaycan dövlətçiliyinin müasir əsaslarını qoymaq üçün səfərbər edib, cəmiyyətdə parçalanmanın qarşısını alıb və milləti öz ətrafında birləşdirib”.
Şəhər rəhbəri Sergey Pançin Ulyanovsk vilayətinin qubernatoru Sergey Morozovun salamlarını tədbir iştirakçılarına çatdırıb. Şəhər meri öz çıxışında Heydər Əliyevin “Aleksandr Suvorov” teploxodunun qəzaya uğraması ilə bağlı yaradılmış hökumət komissiyasının sədri kimi Ulyanovska səfərini xatırladıb. Onun sözlərinə görə, Ulyanovsk vilayətində yaşayan müxtəlif millətlərin liderlərinin yad edilməsi və onlara göstərilən ehtiram regionda aparılan irimiqyaslı millətlərarası işin mühüm tərkib hissəsidir. Bu istiqamətdə qazanılan nailiyyətlər federal səviyyədə qiymətləndirilib – dekabrın 10-da Ulyanovsk şəhəri nüfuzlu ümumrusiya forumunun “Vətənpərvərlik və millətlərarası tərbiyə” nominasiyasında 2-ci yerə layiq görülüb.
Tədbir iştirakçıları Azərbaycan və Rusiyanın dövlət himnlərinin sədaları altında abidənin önünə əklil qoyublar. Onların arasında çoxlu gənclər, o cümlədən Rusiya Azərbaycanlıları Gənclər Birliyinin (RAGB) Ulyanovsk bölməsinin nümayəndələri də olub. Bu gənclərin bir çoxu Rusiyada anadan olub və böyüyüb, lakin öz tarixi vətəni ilə əlaqələri davam etdirir, ana dilimizi yaxşı bilir və diaspor təşkilatının işində fəal iştirak edirlər.
RAGB-nin Ulyanovsk bölməsinin rəhbəri Üzeyir Hüseynov qeyd edib ki, indiki gənclər öz üzərinə düşən məsuliyyəti yaxşı dərk edir, atalarının işini davam etdirir, ilk növbədə, ümummilli lider Heydər Əliyevin vəsiyyətlərinə əməl edirlər. O əlavə edib: “Qoy bu dahi şəxsiyyətin xatirəsi hamımızı ruhlandırsın!”