Bakı, 13 iyun, AZƏRTAC

Hər il xalqımız 15 iyun tarixini böyük ruh yüksəkliyi və təntənə ilə bayram edir. Müstəqilliyimizin tarixi 1991-ci ildən başlasa da, əsl müstəqilliyimiz Milli Qurtuluş Günü ilə bağlıdır. Ulu öndər Heydər Əliyev hakimiyyətə qayıdanda respublikamız dərin böhran içərisində idi. Bütün sahələrdə xaos, özbaşınalıq, tənəzzül hökm sürürdü. Ümummilli Liderimizin hakimiyyətə ikinci dəfə gəlməsi xarici və daxili düşmənlərimizi çox narahat etmişdi. Onlar Azərbaycanı parçalamaq, dünya xəritəsindən silmək üçün öz bəd niyyətlərini həyata keçirə bilməyəcəklərini dərk edirdilər. Düşmənlərimizin Azərbaycanın cənub bölgəsində qondarma “Talış-Muğan” respublikası yaratmaq cəhdi və buna bənzər başqa mənfur planları Heydər Əliyevin müdrik siyasəti nəticəsində iflasa uğramışdı.

Bu fikirləri AZƏRTAC-a müsahibəsində Azərbaycan Dövlət Mədəniyyət və İncəsənət Universitetinin rektoru, sənətşünaslıq üzrə elmlər doktoru, professor Ceyran Mahmudova söyləyib. Rektor vurğulayıb ki, Ulu Öndər, ilk növbədə, cəbhədə atəşkəs elan edilməsinə nail olub. Ordu quruculuğunda təcili tədbirlər həyata keçirilib. Dağlıq Qarabağ problemi ilə bağlı Ali Sovetdə müxtəlif görüşlər, müzakirələr aparılıb. Hərbi sahədə kadr dəyişikliyi edilib.

Professor Ceyran Mahmudova qeyd edib ki, 1993-cü ilin iyun-sentyabr aylarında Ali Sovetdə Heydər Əliyevin müzakirəyə çıxardığı məsələlərdən biri gənclik problemi idi. Belə ki, 1993-cü il sentyabr ayının 22-də Ali Sovetdə Azərbaycan gənclərinin nümayəndələri ilə xüsusi görüş keçirilib və gəncliyin problemləri geniş müzakirə olunub. Həmin tədbirdə Heydər Əliyev demişdi: “Gənclər arasında son vaxtlar elə bir təbəqə yaranıb ki, təhsil onları maraqlandırmır, mədəniyyət də maraqlandırmır... Əsrlərboyu inkişaf etmiş dünya sivilizasiyası möhkəm təhsil və elm üzərində qurulmuşdur, yüksək tərbiyə üzərində qurulmuşdur. Mən bizim gənclərimizi də bu yola dəvət edirəm”.

Heydər Əliyevin ən çox diqqət yetirdiyi sahələrdən birinin təhsil olduğunu bildirən professor Ceyran Mahmudova deyib: “Ümummilli Liderin diqqət və qayğısı sayəsində Azərbaycan təhsili yeni inkişaf mərhələsinə qədəm qoydu. Yeni ali məktəblər açıldı. Mövcud ali təhsil ocaqlarında yeni ixtisaslar üzrə kadr hazırlığına başlanıldı.

Ulu öndərimizin fədakarlığı sayəsində o dövrdə təkcə təhsil və elm sahəsində deyil, həyatımızın digər sahələrində də dirçəlmə hiss olundu, böhran tədricən aradan qaldırıldı. 1993-cü il oktyabr ayının 3-də Heydər Əliyev Azərbaycan Respublikasının Prezidenti seçildi. Xalq öz siyasi liderinə yekdilliklə səs verdi. Doğrudur, bütün problemlər dərhal həll olunmadı. Sonrakı illərdə dövlət çevrilişi cəhdləri də oldu. Lakin heç bir qara qüvvə Ümummilli Liderimizin polad iradəsinə qalib gələ bilmədi. Müstəqil respublikamız gündən-günə inkişaf etdi, onun şöhrəti dünyaya yayıldı. Heydər Əliyevin rəhbərliyi ilə müstəqil Azərbaycanın Konstitusiyası hazırlandı və 1995-ci ildə ümumxalq səsverməsi yolu ilə qəbul olundu. Ulu Öndərin zəkasının nuru ilə sonrakı illərdə daha böyük uğurlar qazanıldı”.

Mədəniyyət və İncəsənət Universitetinin rektoru vurğulayıb ki, Prezident İlham Əliyev ulu öndər Heydər Əliyev ənənələrinin davam və inkişaf etdirilməsi və daha böyük nailiyyətlər əldə edilməsi üçün var qüvvəsini əsirgəmir. Həyatımızın elə bir sahəsi yoxdur ki, orada Heydər Əliyev zəkasının izi görünməsin. Prezident İlham Əliyevin sözləri ilə desək: “2003-cü ildən bu günə qədər Heydər Əliyev siyasəti Azərbaycanda yaşayır, davam etdirilir, zənginləşdirilir”.