Tərtər, 12 dekabr, Tahir Ağaməmmədov, AZƏRTAC

Xalqımızın Ümummilli Lideri, böyük siyasi xadim Heydər Əliyevin əziz xatirəsi Qarabağ bölgəsində dərin ehtiramla yad edilib.

AZƏRTAC xəbər verir ki, dekabrın 12-də Ümummilli Liderin Tərtər şəhərinin mərkəzi meydanındakı abidəsini minlərlə insan ziyarət edib. Tərtərlilər dahi rəhbər Heydər Əliyevin abidəsi önünə gül-çiçək dəstələri düzərək, xatirəsini ehtiramla anıblar.

Mərasim iştirakçıları sonra Heydər Əliyev Mərkəzinə gələrək, Ulu Öndərin mənalı ömür yolunu əks etdirən eksponatlarla tanış olublar. Burada keçirilən tədbirdə rayon icra hakimiyyətinin başçısı Müstəqim Məmmədov çıxış edərək, xalqımızın böyük oğlu Heydər Əliyevin zəngin həyat və fəaliyyətindən, ölkəyə rəhbərlik etdiyi hər iki dövrdə gördüyü işlərdən danışıb. Bildirib ki, Azərbaycanın ən yeni tarixinin bütöv bir qərinəsi Heydər Əliyevin adı ilə bağlıdır. “Azərbaycan tarixinin Heydər Əliyev mərhələsi” kimi qiymətləndirilən bu dövrdə Ulu Öndərimiz tərəfindən görülən böyük işlərin nəticəsidir ki, bu gün xalqımız demokratik və hüquqi bir dövlətdə yaşamaq imkanı əldə edib. Ulu Öndərin müdrik və məqsədyönlü siyasəti nəticəsində ölkəmizdə ictimai-siyasi sabitlik bərqərar olub, hüquqi, demokratik dövlət quruculuğu, Milli Ordunun formalaşması, Azərbaycanın beynəlxalq aləmdə demokratik imicinin yüksəlməsi istiqamətində önəmli addımlar atılıb.

Tədbirin sonunda Ümummilli Liderin həyat və fəaliyyətindən bəhs edən film nümayiş etdirilib, ehsan süfrəsi açılıb.

X X X

Xalqımızın böyük oğlu, ümummilli lider Heydər Əliyevin əziz xatirəsi Ağdam rayonunda da dərin hörmət və ehtiramla anılıb. Səhər saatlarından başlayaraq ağdamlılar Ümummilli Liderin Quzanlı qəsəbəsindəki abidəsini ziyarət edərək, önünə gül dəstələri düzüblər. Mərasimdə rayon rəhbərliyi, YAP rayon təşkilatının fəalları, hüquq-mühafizə orqanlarının əməkdaşları, əmək kollektivləri, ziyalılar, ağsaqqallar, veteranlar, gənclər, rayon ictimaiyyətinin nümayəndələri iştirak ediblər.

AZƏRTAC xəbər verir ki, Ağdam Dövlət Dram Teatrında keçirilən tədbirdə çıxış edənlər ulu öndər Heydər Əliyevin həyat və fəaliyyətinin ayrı-ayrı məqamlarından bəhs edib, dahi rəhbərin xilaskarlıq missiyasından, Azərbaycanın müstəqilliyinin bərpası və möhkəmləndirilməsindəki xidmətlərindən danışıblar.

X X X

Dünya şöhrətli siyasətçi Heydər Əliyevin əziz xatirəsi ağcabədililər tərəfindən daim uca tutulur.

AZƏRTAC xəbər verir ki, dekabrın 12-də səhər saatlarından başlayaraq minlərlə rayon sakini dahi şəxsiyyətin Ağcabədi şəhərinin mərkəzi meydanındakı abidəsini ziyarət edib, önünə gül dəstələri düzüblər. Ümummilli Liderin əziz xatirəsi bir dəqiqəlik sükutla yad edilib, ruhuna dualar oxunub.

Rayon rəhbərliyi, ictimaiyyət nümayəndələri, ziyalılar, ağsaqqallar, gənclər Heydər Əliyev Mərkəzində Ulu Öndərin zəngin həyatını və siyasi fəaliyyətini əks etdirən eksponatlarla tanış olublar.

X X X

Ulu öndər Heydər Əliyevin vəfatının 13-cü ildönümü ilə əlaqədar Füzuli rayonunun idarə, müəssisə və təşkilatlarında silsilə anım tədbirləri keçirilib.

AZƏRTAC xəbər verir ki, dekabrın 12-də rayon rəhbərliyi, hüquq-mühafizə orqanlarının əməkdaşları, əmək kollektivləri, ağsaqqallar, gənclər, hərbi hissənin zabit və əsgərləri Horadiz şəhərində ulu öndər Heydər Əliyevin abidəsini ziyarət edərək, xatirəsinə hörmət və ehtiramlarını bildiriblər.

Füzuli Rayon İcra Hakimiyyətinin başçısı Alı Alıyev ictimaiyyət nümayəndələri qarşısında çıxışında ümummilli lider Heydər Əliyevin Vətən və xalq qarşısındakı xidmətlərindən danışıb. Bildirib ki, ulu öndər Heydər Əliyevin müstəqilliyimizin və dövlətçiliyimizin möhkəmlənməsində xidmətləri əvəzsizdir. On üç il əvvəl əbədiyyətə qovuşan Heydər Əliyevin əziz xatirəsi füzulililərin qəlbində daim yaşayacaq, heç vaxt yaddaşlardan silinməyəcək.