Bakı, 7 may, AZƏRTAC

Səfərbərlik və Hərbi Xidmətə Çağırış üzrə Dövlət Xidməti (SHXÇDX) mayın 7-də kütləvi informasiya vasitələrinin (KİV) nümayəndələri arasında ümummilli lider Heydər Əliyevin xatirəsinə həsr olunmuş VII atıcılıq turniri keçirib.

Xidmətdən AZƏRTAC-a bildiriblər ki, “Hərbi vətənpərvərlik və mütəxəssis hazırlığı mərkəzi” MMC-nin Sabunçu rayon filialında keçirilən yarışa hər biri üç nəfərdən ibarət olan 13 media komandası qatılıb.

Tədbir Azərbaycan Respublikası Dövlət Himninin ifası ilə başlayıb.

Turnirdə çıxış edən SHXÇDX rəisinin müavini, general-leytenant Zaur Abdullayev KİV nümayəndələrini salamlayaraq bildirib ki, ümummilli lider Heydər Əliyevin xatirəsinə həsr olunmuş ənənəvi atıcılıq turniri Nazirlər Kabinetinin “Xüsusi karantin rejiminin müddətinin uzadılması və bəzi məhdudiyyətlərin aradan qaldırılması ilə bağlı əlavə tədbirlər barədə” 2022-ci il 22 aprel tarixli Qərarından sonra yenidən təşkil olunub. General-leytenant Zaur Abdullayev ümummilli lider Heydər Əliyevin müəllifi olduğu milli dövlətçilik konsepsiyası və müasir hərb quruculuğu prosesinin Prezident İlham Əliyev tərəfindən uğurla inkişaf etdirildiyini qeyd edib. Diqqətə çatdırılıb ki, artıq ölkəmiz regionun lideri, beynəlxalq sistemin nüfuzlu subyektlərindəndir. 2020-ci il sentyabrın 27-də düşmənin təmas xəttində növbəti təxribatına cavab olaraq Azərbaycan Silahlı Qüvvələrinin həyata keçirdiyi əks hücum əməliyyatı dövlətimizin və ordumuzun gücünü, xalqımızın qüdrətini dünyaya nümayiş etdirib. Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qələbə qazanan Azərbaycan Silahlı Qüvvələri işğal altında olan torpaqlarımızı azad edərək ərazi bütövlüyünü bərpa etməyə nail olub. Ali Baş Komandanın qətiyyəti, xalq və ordunun sarsılmaz birliyi, əsgər və zabitlərimizin Vətən sevgisi Zəfərin qazanılmasında mühüm rol oynayıb. Ölkə rəhbərliyi başda olmaqla cəmiyyətin hər bir üzvü qələbəyə səfərbər olub. Eyni zamanda düşmənlə informasiya müharibəsində də üstünlük qazanılıb. Prezident İlham Əliyev dünyanın aparıcı mediasına verdiyi 30-dan çox müsahibə ilə dünya informasiya məkanında ölkəmizə qarşı olan hücumları məğlub edib.

Z.Abdullayev Vətən müharibəsi dövründə ölkə mediasının kifayət qədər məhsuldar fəaliyyət göstərdiyini, düşmənin mülki əhalini, iri yaşayış məntəqələrini hədəfə alaraq qadağan edilmiş silahlardan istifadə etməklə törətdiyi hərbi cinayətlərin dünya ictimaiyyətinə çatdırılmasında kütləvi informasiya vasitələrinin rolunu vurğulayıb. Qeyd edib ki, SHXÇDX mətbuatla əməkdaşlığa hər zaman önəm verir, ölkəmizdə hərbi-vətənpərvərlik tərbiyəsi işinin aparılması, müddətli həqiqi hərbi xidmətə çağırışın təşkilinin işıqlandırılması istiqamətində KİV-in fəaliyyəti yüksək qiymətləndirilir. Z.Abdullayev çıxışının sonunda Ümummilli Liderin xatirəsinə həsr edilmiş turniri açıq elan edib, iştirakçılara xoş əhval-ruhiyyə və uğurlar arzulayıb.

Media təmsilçiləri təhlükəsizlik qaydaları barədə təlimatlandırıldıqdan sonra yarışa start verilib.

Turnirdə iştirak edən komandalar iki mərhələdə mübarizə aparıblar. Birinci mərhələdə ən yaxşı nəticəni göstərən beş komanda ikinci mərhələdə ilk üçlüyü müəyyənləşdirib. İki mərhələnin yekununda birinci yeri “Report” İnformasiya Agentliyinin, ikinci yeri Azpress.az saytının, üçüncü yeri “Səs” İnformasiya Agentliyinin əməkdaşlarından ibarət komandalar tutublar.

Qaliblərə kubok, medal, diplom və pul mükafatları təqdim edilib.