CƏMİYYƏT


Ürək çatışmazlığında yeniliklər konqresi işə başlayıb VİDEO

Bakı, 3 iyun, AZƏRTAC

İyunun 3-də Azərbaycan Kardiologiya Cəmiyyətinin təşkilatçılığı ilə Ürək çatışmazlığında yeniliklər konqresi işə başlayıb.

AZƏRTAC xəbər verir ki, tədbirdə çıxış edən Azərbaycan Kardiologiya Cəmiyyətinin sədri Üzeyir Rəhimov tədbirin məqsədinin kardiologiyada ən çox qeydə alınan ürək çatışmazlığı xəstələrinin müalicəsi, profilaktikası sahəsində həkimlərin bilik və bacarıqlarının təkmilləşdirilməsi olduğunu deyib.

“Tədbirdə Türkiyə, Gürcüstan, Qazaxıstan, Avropa Kardiologiya Cəmiyyətindən mütəxəssislər iştirak edirlər. Konqres Türkiyə Kardiologiya Cəmiyyəti və Avropa Kardiologiya Cəmiyyətinin dəstəyi ilə keçirilir. Ümid edirəm ki, konqres xalqımız üçün faydalı olacaq və vətəndaşlara göstərilən kardioloji xidmətin keyfiyyətinin daha da artırılmasına kömək edəcək", - deyə cəmiyyətin sədri bildirib.

Ü.Rəhimov cəmiyyətin kardiologiya sahəsində təşkil etdiyi konfranslar, həkimlər üçün EXQ kursları, həyata keçirilən sosial layihələr barəsində məlumat verib və gələcək planlardan danışıb. O, sentyabrda Şuşada kardiologiya sahəsinə dair konfrans keçiriləcəyini də diqqətə çatdırıb.

Konqresdə çıxış edən Səhiyyə Nazirliyinin nümayəndəsi Ülvi Mirzəyev ürək çatışmazlığının yoluxucu olmayan xəstəliklər arasında ən vacib xəstəliklərdən biri olduğunu vurğulayıb: “Səhiyyə sistemlərinin effektivliyi ürək çatışmazlığı ilə əlaqədar olan meyarlarla - xəstələrin vəziyyəti, onların xəstəxanaya yatışı, xəstəliyin mortallıq və morbidliyi ilə ölçülür. Ürək çatışmazlığı hər birimiz üçün prioritet məsələlərdən biridir. Həmin xəstəliklə mübarizədə hər kəsin dəstəyi, poliklinika, xəstəxana həkimləri, terapevtlər, kardioloqlar, ümumi ailə həkimləri, kardiologiya cərrahları, kardioreabilitoloqların birgə komanda şəklində çalışması çox vacibdir”.

Azərbaycan Kardiologiya Cəmiyyətinin ürək çatışmazlığı işçi qrupunun sədri Aysel İslamlı, Türkiyə Kardiologiya Cəmiyyətinin ürək çatışmazlığı işçi qrupunun sədri Ahmet Çelik, Avropa Kardiologiya Cəmiyyətinin nümayəndəsi Ana Abreu bu sahədə bilik və təcrübə mübadiləsinin, yeniliklərin bölüşülməsinin xəstəliklə mübarizədə daha effektiv nəticə əldə edilməsinə töhfə verəcəyinə inandıqlarını bildiriblər.

Tədbir “Ağır ürək çatışmazlığı”, “Kəskin ürək çatışmazlığının idarə olunması”, “HFrEF və aritmiyalar”, “Ürək çatışmazlığında tövsiyədən kənar yanaşmalar” və “Ürək çatışmazlığı və pulmonar hipertenziya” mövzularında panel sessiyalarla davam edib.

Konqresin işinə iyunun 4-də yekun vurulacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.