Bakı, 20 noyabr, AZƏRTAC

Noyabrın 20-də Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə BMT-nin Uşaq Fondu (UNİSEF) arasında Anlaşma Memorandumunun imzalanması mərasimi keçirilib.

AZƏRTAC xəbər verir ki, memorandumu agentliyin sədri Ülvi Mehdiyev və UNİSEF-in Azərbaycandakı nümayəndəsi Edvard Karvardin imzalayıblar.

Mərasimdə Ülvi Mehdiyev agentliyin rəqəmsal hökumət və innovasiyalar sahəsində layihələri, o cümlədən uşaq hüquqlarının qorunması, təbliği, bu istiqamətdə paytaxtda və regionlarda əhalinin maarifləndirilməsi sahəsində həyata keçirdiyi tədbirlər haqqında ətraflı məlumat verib: “Əslində UNİSEF-lə əməkdaşlığımız “ASAN xidmət” yaranandan etibarən mövcuddur. 2013-cü ildən “ASAN xidmət” mərkəzlərində UNİSEF-lə birgə bir sıra proqramlar həyata keçirdirik. Bir neçə “ASAN xidmət” mərkəzində uşaq hüquqlarının təbliğatı ilə bağlı UNİSEF xidməti otaqları ayrılıb. Orada vətəndaşlar uşaq hüquqları ilə bağlı maarifləndirilə bilirlər. Eyni zamanda, “ASAN Könüllüləri” Təşkilatı tərəfindən uşaq hüquqları ilə bağlı bir sıra tədbirlər həyata keçirilib. Son olaraq ötən il 2 min vətəndaşı əhatə edən bir illik böyük tədbir təşkil olunub. Burada əsas məqsəd regionlarda vətəndaşların, valideynlərin uşaq hüquqları ilə bağlı maarifləndirilməsi olub”.

Ü.Mehdiyev memorandumun uşaq hüquqları sahəsində müxtəlif layihələrin həyata keçirilməsini və əməkdaşlıq çərçivəsində bu sahədə rəqəmsal hökumət üzrə yeni həlləri dəstəkləyən proqramların, birgə innovativ layihələrin reallaşdırılmasını əhatə etdiyini diqqətə çatdırıb. O, bildirib ki, həmçinin ASAN könüllüləri tərəfindən uşaq hüquqlarının təşviq olunması, ictimai maarifləndirmənin artırılması planlaşdırılır. Agentliyin sədri memorandumun əməkdaşlığın genişləndirilməsində yeni imkanlar yaradacağını da vurğulayıb.

Edvard Karvardin bildirib ki, Uşaq Hüquqları üzrə Konvensiyanın 30-cu ildönümünün qeyd olunduğu bir vaxtda uşaqlar üçün bu hüquqların öhdəlikdən reallığa çevrilməsi məqsədilə tərəfdaşlıqların qurulması vacibdir. Qeyd olunub ki, UNİSEF və agentlik arasındakı bu yeni əməkdaşlıq ölkə boyunca minlərlə ailəni uşaq hüquqları və sosial innovasiyalar barədə çox vacib məlumatlarla təmin etməyə kömək edəcək ki, bu da uzunmüddətli faydalı nəticələr göstərəcək.

UNİSEF-in ölkəmizdəki nümayəndəsi Azərbaycanın müstəqillik əldə etdikdən sonra Konvensiyanı ratifikasiya edən ilk ölkələrdən biri kimi uşaq hüquqları ilə əlaqədar siyasətini onun müddəalarına uyğun qurduğunu və vacib tədbirlər həyata keçirdiyini də diqqətə çatdırıb.

Sonra qonaqlar məktəb şagirdlərinin hazırladığı “Uşaq hüquqları Konvensiyası: uşaqların gözü ilə” sərgisi ilə tanış olublar.

Qeyd edək ki, noyabrın 20-si Ümumdünya Uşaq Günü kimi qeyd olunur. 1954-cü ildə BMT Baş Assambleyası bütün dünyada uşaqların rifahının yaxşılaşdırılmasına yönəldilən fəaliyyətə həsr edilən bu günü bütün dünya ölkələrinə qeyd etməyi məsləhət görüb. BMT-nin Baş Assambleyası 1959-cu il noyabrın 20-də Uşaq hüquqları Bəyannaməsini, 1989-cu ilin həmin günündə isə Uşaq hüquqları haqqında Konvensiyanı qəbul edib.

UNİSEF və “ASAN Könüllüləri” Təşkilatı da Uşaq Hüquqları Konvensiyasının 30 illik yubileyi ərəfəsində müxtəlif tədbirlər həyata keçirib.