Bakı, 28 fevral, AZƏRTAC

Bakı Şəhəri üzrə Təhsil İdarəsinin (BŞTİ) tabeliyindəki ümumtəhsil məktəblərinin təhsilin digər dildə aparıldığı bölmələrində məktəbəhazırlıq qruplarına cəlb olunmuş uşaqların şifahi nitq bacarıqlarının qiymətləndirilməsi ilə bağlı müsahibə prosesi izlənilib.

Təhsil İdarəsindən AZƏRTAC-a bildirilib ki, BŞTİ-nin struktur bölmə rəhbərləri, valideynlər və media nümayəndələri müsahibənin gedişini yaxından izləyib, bu proseslə bağlı onları maraqlandıran suallara aydınlıq gətirilib.

Media nümayəndələrinə müsahibə komissiyalarında yaradılan şərait, valideyn məmnunluğunun və şəffaflığın təmini istiqamətində atılan addımlar barədə geniş məlumat verilib. Qeyd olunub ki, paytaxtdakı ümumi təhsil məktəbləri üzrə məktəbəhazırlıq qruplarının təhsilin digər dildə aparıldığı bölmələrindəki uşaqların şifahi nitq bacarıqlarının yoxlanılması ilə bağlı 8 Müsahibə Komissiyası fəaliyyət göstərir. Şifahi nitq bacarıqlarının qiymətləndirilməsinin 5 meyar üzrə (dinlədiyini anlayır, ünsiyyət qurur, öz fikrini sadə formada ifadə edə bilir, söz və ya söz birləşmələrinin tələffüzünü düzgün edir, özü və ailə üzvləri haqqında qısa məlumat verir) aparıldığı nəzərə çatdırılıb.

Qeyd edək ki, müsahibə komissiyalarının tərkibi yüksək peşəkarlıq səviyyəsinə malik 3 müəllimdən ibarətdir. Komissiyaların fəaliyyətinə ümumi nəzarət mərkəzin rəhbəri tərəfindən həyata keçirilir. Müsahibə prosesində obyektivlik və şəffaflığın tam təmin olunması üçün videoçəkiliş aparılır. Həmçinin müsahibədə valideynin və ya qanuni nümayəndənin iştirakına şərait yaradılır. Eləcə də müsahibə prosesinin vebkameralar vasitəsilə canlı izlənilməsi həyata keçirilir.

Uşağın şifahi nitq bacarıqlarının qiymətləndirilməsi komissiya üzvlərinin yazılı rəyi ilə təsdiqlənir. Yekun rəylə bağlı sualı yaranan valideynlərin müraciətinə müsahibələr başa çatdıqdan sonra videogörüntülər əsasında yenidən baxılaraq aydınlıq gətiriləcək.

Qeyd edək ki, tədrisin Azərbaycan dilində aparıldığı məktəbəhazırlıq qruplarına cəlb olunmuş uşaqlar elektron sistemdə avtomatik olaraq təhsil aldıqları məktəblərin I siniflərinə qəbul edilir. “Ümumi təhsil haqqında” Azərbaycan Respublikası Qanununa əsasən, təhsilin digər dildə aparıldığı məktəbəhazırlıq qruplarına cəlb olunmuş uşaqların I siniflərə qəbulu isə şifahi nitq bacarığını qiymətləndirən müsahibələrin nəticəsi əsasında aparılır. Proses uşaqların yaş və psixoloji hazırlıq səviyyəsi nəzərə alınmaqla həyata keçirilir.