Üstündə “Kalaşnikov” gəzdirən şəxs saxlanılıb VİDEO
AzerTAg.az
Bakı, 2 fevral, AZƏRTAC
Nəsimi Rayon Polis İdarəsinin 21-ci Polis Bölməsinin əməkdaşları tərəfindən həyata keçirilən əməliyyat nəticəsində sosial şəbəkələrdə cinayətkarlığı təbliğ edərək videolar paylaşan və üstündə qanunsuz olaraq odlu silah-sursat gəzdirən şəxs saxlanılıb.
Bu barədə AZƏRTAC-a Daxili İşlər Nazirliyinin mətbuat xidmətindən məlumat verilib.
Bildirilib ki, əvvəllər də məhkum olunmuş İmişli rayon sakini Qasıməli Qasımov tutularaq istintaqa təqdim edilib. Ondan bir ədəd “Kalaşnikov” markalı avtomat, 3 ədəd patron və həmin silaha məxsus bir ədəd daraq aşkar edilib. Qasıməli Qasımov odlu silah-sursatı bir müddət əvvəl əldə etdiyini, lakin polisə təhvil verməyərək özündə saxladığını bildirib.
Faktla bağlı toplanan materiallar Nəsimi Rayon Polis İdarəsinin İstintaq Şöbəsinə göndərilib.
Əməliyyat-istintaq tədbirləri davam etdirilir.
Xəbərin mətnində orfoqrafik səhv var
