Bakı, 25 iyul, AZƏRTAC 

İyulun 25-də “EYOF Bakı 2019” XV Avropa Gənclər Yay Olimpiya Festivalının Bakı Su İdmanı Sarayında keçirilən üzgüçülük yarışlarında dördüncü günə yekun vurulub.

AZƏRTAC xəbər verir ki, bu gün Azərbaycan atleti Maksim Petrenko 50 və 200 metr məsafəyə sərbəst üzmə yarışlarında müvafiq olaraq 26.03 və 2 dəqiqə 4.66 saniyə nəticə göstərərək mübarizəni erkən dayandırıb. Ramil Vəlizadə isə 100 metr məsafəyə batterflay üsulla üzmə yarışında yarımfinala adlayıb. Üzgüçümüz finişə 56.83 saniyəyə çataraq həlledici mərhələyə vəsiqə uğrunda mübarizə imkanı əldə edib. R.Vəlizadə yarımfinalda nəticəsini yaxşılaşdırsa da (56.12 saniyə) bu, ona finala adlamağa kifayət etməyib. O, müəyyən olunmuş məsafəyə doqquzuncu çatıb. Bu yarışda ən yaxşı nəticəni danimarkalı Rasmus Nikelsen göstərib. Skandinaviya təmsilçisi finişi 53.47 saniyəyə qət edib. Polşalı Pavel Urinyuk (54.27 saniyə), avstriyalı Martin Espernberger (54.58 saniyə), rusiyalı Andrey Çulkov (54.86 saniyə), macarıstanlı Hubert Kos (55.11 saniyə), almaniyalı Kirill Lammert (55.29 saniyə), türkiyəli Sarpcan Tezel (55.37 saniyə) və italiyalı Matteo Ritarossi (55.66 saniyə) finala vəsiqə əldə ediblər.

Oğlanlar arasında 100 metr məsafəyə batterflay üsulla üzmə yarışının qalibi iyulun 26-da müəyyənləşəcək.

Digər idmançımız Məryəm Şeyxəlizadəxangah “EYOF Bakı 2019”da 100 metr məsafəyə batterflay üsulla üzmə yarışında altıncı yeri tutub. Təmsilçimiz finalda 1 dəqiqə 0.95 saniyə nəticə göstərib. Yarışın qalibi adına rusiyalı Aleksandra Sabitova layiq görülüb. O, finişə 59.07 saniyəyə çatıb. Rəqibindən cüzi fərqlə geri qalan belçikalı Roos Vanotterdyik (59.33 saniyə) gümüş, almaniyalı Amelie Zaxenhuber (1:00.01 saniyə) bürünc medal qazanıblar.

Bu, Rusiya atleti Aleksandra Sabitovanın ikinci çempionluğudur. O, iyulun 23-də qızlar arasında 100 metr məsafəyə sərbəst üsulla üzmə yarışında da qızıl medal qazanıb.

Türkiyəli üzgüçü Beril Böcekler və Rusiyanın digər atleti Aleksey Tkaçev də festivalın üzgüçülük yarışlarında ikinci dəfə çempionluq sevinci yaşayıblar. B.Böcekler qızlar arasında 200 metr məsafəyə sərbəst üzmə yarışlarında rəqiblərini qabaqlayaraq birinci olub - 2 dəqiqə 0.62 saniyə. Böyük Britaniya atleti Freya Kolbert (2:00.90) və polşalı Viktoriya Qusk (2:02.36) ilk üçlüyü tamamlayıblar.

Rusiya üzgüçüsü Aleksey Tkaçev isə ikinci qızıl medalı oğlanlar arasında 200 metr məsafəyə arxası üstə üzmə yarışında qazanıb (2:01.24). Türkiyəli Berke Saka (2:01.62) gümüş, Polşa təmsilçisi Filip Kosinski (2:02.79) isə bürünc medala sahib olublar.

Qeyd edək ki, iyulun 23-də Aleksey Tkaçev oğlanlar arasında 100 metr məsafəyə arxası üstə, Beril Böcekler isə qızlar arasında 400 metr məsafəyə sərbəst üsulla üzmə yarışında çempion adını qazanıblar.

Dördüncü yarış günü Polşa üzgüçüləri festivalda ilk qızıl medala sahib olublar. Oğlanlar arasında 50 metr məsafəyə sərbəst üzmə yarışında Mateuş Çovaniek birinci yeri tutub. Finalda 22.91 saniyə nəticə göstərən atlet festivalın üzgüçülük yarışlarında ölkəsinə ilk qızıl medalı qazandırıb. Rumıniyalı David Popoviçi (23.03 saniyə) gümüş, Niderland üzgüçüsü Tim Korstanye (23.08 saniyə) bürünc medal əldə ediblər.

Azarkeşlər festivalın 4x100 metr məsafəyə qarışıq üzmə yarışlarında gərgin idman mübarizəsi izləyiblər. Yarışın favoritləri Rusiya və Böyük Britaniya təmsilçiləri gözlənildiyi kimi medalçılar sırasında yer alıblar. Belə ki, şimal qonşularımız (3:54.27) növbəti dəfə fəxri kürsünün ən yüksək pilləsinə qalxıblar. Finalda 3 dəqiqə 57.06 saniyə nəticə göstərən qərbi avropalılar ikinci yeri tutublar. Finişə üçüncü çatan Fransa üzgüçüləri (3:57.54) bürünc medallara sahib olublar.

Bu gün, ümumilikdə 9 ölkə təmsilçisi fəxri kürsüdə yer alıb. Rusiya (3 qızıl), Türkiyə (1 qızıl, 1 gümüş), Polşa (1 qızıl, 2 bürünc), Böyük Britaniya (2 gümüş), Belçika, Rumıniya ( hər biri 1 gümüş), Almaniya, Fransa və Niderland (hər biri 1 bürünc) atletləri medallara sahib olublar.

Sonra yarışlarda ilk üç yeri tutan atletlərə medal və hədiyyələr təqdim edilib. Mükafatlandırma mərasimində “Bakı-2019” Avropa Gənclər Yay Olimpiya Festivalının korporativ direktoru Elçin Səfərov, Azərbaycan Üzgüçülük Federasiyasının vitse-prezidenti Elçin Həsənov və başqaları iştirak ediblər.

İyulun 26-da festivalın üzgüçülük yarışlarına yekun vurulacaq. Sonuncu yarış günündə Məryəm Şeyxəlizadəxangah 50 metr məsafəyə, Aysel Səfərova 800 metr məsafəyə sərbəst, Elyar Cahangirbəyov isə 400 metr məsafəyə fərdi qaydada qarışıq üzmə yarışlarında qüvvələrini sınayacaqlar.

Qeyd edək ki, festivalın üzgüçülük yarışlarında Azərbaycan 6 atlet - Rəşad Alquliyev, Elyar Cahangirbəyov, Maksim Petrenko, Ramil Vəlizadə, Aysel Səfərova və Məryəm Şeyxəlizadəxangah ilə təmsil olunur.