“Vaxt, iş və prioritetlərin idarə edilməsi” mövzusunda təlim

Bakı, 4 dekabr, AZƏRTAC

Maliyyə sahəsi üzrə ekspert Volfgang Rautenberg Qiymətli Kağızlar üzrə Dövlət Komitəsi (QKDK), Bakı Fond Birjası (BFB) və Milli Depozit Mərkəzi (MDM) əməkdaşları üçün “Vaxt, iş və prioritetlərin idarə edilməsi” mövzusunda təlim keçirib.

MDM-dan AZƏRTAC-a bildiriblər ki, təlimdə vaxtın düzgün planlaşdırılmasının üstünlükləri, bu zaman ən çox yol verilən səhvlər, işin qrafikə salınmasının vacibliyi, məqsədin müəyyən edilməsi qaydaları və digər məqamlar əhatə olunub və mövzular ətrafında məzmunlu müzakirələr aparılıb.

Tədbir “Kapital bazarlarının müasirləşdirilməsi” layihəsi çərçivəsində həyata keçirilib.

Layihənin məqsədi qabaqcıl beynəlxalq təcrübədən istifadə etməklə “2011-2020-ci illərdə Azərbaycan Respublikasında qiymətli kağızlar bazarının inkişafı” Dövlət Proqramının icrası üçün zəruri texniki, təşkilati və məlumat dəstəyini təmin etməkdir.