Bakı,18 iyun, Ş.Abdullayeva, AZƏRTAC

İyunun 18-də Azərbaycan Milli Elmlər Akademiyasının (AMEA) Mərkəzi Elmi Kitabxanasında Azərbaycan Respublikasının Vəkillər Kollegiyası və AMEA-nın Hüquq və İnsan Haqları İnstitutu arasında anlaşma memorandumunun imzalanması və vəkilliyə namizədlərin təntənəli andiçmə mərasimi keçirilib.

AZƏRTAC xəbər verir ki, tədbiri açan AMEA-nın Hüquq və İnsan Haqları İnstitutunun direktoru, Milli Məclisin deputatı Aytən Mustafazadə insan hüquqlarının müdafiəsinin əhəmiyyəti, bu istiqamətdə aparılan islahatlar, aztəminatlı əhaliyə ödənişsiz hüquqi yardım göstərilməsinin zəruriliyi, Vəkillər Kollegiyası tərəfindən bu sahədə görülən işlər haqqında danışıb.

O bildirib ki, Prezident İlham Əliyevin uğurlu siyasəti nəticəsində respublikada bütün sahələri əhatə edən islahatlar həyata keçirilir. Bütün bunlar ölkəmizin davamlı tərəqqisini təmin etməklə yanaşı, məhkəmə-hüquq sistemində də islahatlar aparılmasını zəruri edir. Dövlətimizin başçısının 2019-cu il 3 aprel tarixli “Məhkəmə-hüquq sistemində islahatların dərinləşdirilməsi haqqında” Fərmanı bu sahədə aparılan islahatların keyfiyyətcə yeni mərhələyə keçdiyini göstərir. Bu Fərman məhkəmə-hüquq sisteminin müasir tələblərə uyğun təkmilləşdirilməsinə imkan yaradan kompleks addımlar atılması üçün ciddi normativ əsas verir.

Aytən Mustafazadə qeyd edib ki, AMEA-nın Hüquq və İnsan Haqları İnstitutu və Vəkillər Kollegiyası arasında bağlanacaq anlaşma memorandumuna əsasən gələcək əməkdaşlığın əsası qoyulacaq, ödənişsiz hüquqi yardım, eləcə də vəkillərin davamlı tədrisi ilə bağlı birgə tədbirlər həyata keçiriləcək.

Vəkillər Kollegiyasının sədri Anar Bağırov çıxışında diqqətə çatdırıb ki, insan hüquqlarının müdafiəsi sahəsində ilk Dövlət Proqramı ulu öndər Heydər Əliyevin 1998-ci il 18 iyun tarixli Sərəncamı ilə təsdiq olunub. Prezident İlham Əliyevin 2007-ci il 18 iyun tarixli Sərəncamına əsasən iyunun 18-i Azərbaycanda İnsan Hüquqları Günü kimi təsis edilib. Vəkilliyə namizədlərin andiçmə mərasiminin, Vəkillər Kollegiyası ilə Hüquq və İnsan Haqları İnstitutu arasında anlaşma memorandumunun imzalanmasının bu günə təsadüf etməsi çox əlamətdar hadisədir.

Sədr Vəkillər Kollegiyasının fəaliyyəti haqqında geniş məlumat verib. Bildirib ki, son dövrlərdə vəkilliyin inkişafı və nüfuzunun artırılması, maddi-texniki təminatının, o cümlədən vəkillər tərəfindən vətəndaşlara göstərilən hüquqi yardımın keyfiyyətinin yüksəldilməsi istiqamətində bir çox tədbirlər həyata keçirilib. Buna baxmayaraq, Vəkillər Kollegiyasının fəaliyyəti, maliyyə müstəqilliyi, maddi-texniki təminatı, eləcə də regionlarda vəkillərin sayı baxımından müəyyən problemlər mövcuddur. Bu baxımdan, Azərbaycan Respublikası Prezidentinin qeyd olunan Fərmanının müvafiq göstəriş və tövsiyələri, xüsusilə də dövlət hesabına hüquqi yardıma görə vəkilə ödənilməli olan vəsaitin Vəkillər Kollegiyasına verilməsi məsələsi xüsusi əhəmiyyət kəsb edir.

Sonra AMEA-nın Hüquq və İnsan Haqları İnstitutu və Azərbaycan Respublikası Vəkillər Kollegiyasının Rəyasət Heyəti arasında əməkdaşlıq haqqında anlaşma memorandumu imzalanıb. Sənədə əsasən ödənişsiz hüquqi yardım və digər hüquqi sahələrdə tərəflər birgə tədbirlər həyata keçirəcəklər.

Tədbirdə Hüquq və İnsan Haqları İnstitutunun Dövlət və Konstitusiya hüququ şöbəsinin müdiri, Xırdalan şəhər Vəkil Bürosunun rəhbəri Ayxan Rüstəmzadənin “Cinayət işləri üzrə qüsurlu tibbi müdaxilə zamanı sübut etmə problemlərinə praktiki yanaşma” mövzusunda mühazirəsi dinlənilib.

Milli Məclisin deputatı Fazil Mustafa, Azərbaycan Respublikasının Vəkillər Kollegiyasının Ağsaqqallar şurasının sədri İkram Kərimov, Milli QHT Forumunun prezidenti Rauf Zeyni və digər çıxış edənlər Hüquq və İnsan Haqları İnstitutu və Vəkillər Kollegiyası arasında imzalanan əməkdaşlıq haqqında anlaşma memorandumunun əhəmiyyətindən danışıblar. Qeyd ediblər ki, bu əməkdaşlıq hüquq sahəsində kadrlar yetişdirilməsinə və elmi tədqiqatlar aparılmasına, bu sahədə olan boşluqların aradan qaldırılmasına töhfə verəcək.

Sonra vəkilliyə qəbul üzrə ixtisas imtahanlarından müvəffəqiyyətlə keçmiş və icbari təlimi başa vurmuş namizədlərin andiçmə mərasimi olub.

Andiçmə mərasimi Azərbaycan Respublikasının Dövlət himninin səsləndirilməsi ilə başlanıb. Vəkilliyə namizədlər Azərbaycan Respublikasının Dövlət Bayrağı önündə and içiblər və onlara vəsiqələr təqdim edilib.

Tədbirdə Vəkillər Kollegiyasının Rəyasət Heyətinin üzvləri, vəkil qurumlarının rəhbərləri, Milli Məclisin deputatları, xarici ölkələrin səfirliklərinin, yerli və beynəlxalq təşkilatların nümayəndələri iştirak ediblər.