CƏMİYYƏT


Vərəmlə mübarizədə Azərbaycanın müsbət təcrübəsi öyrənilir

Bakı, 2 oktyabr, AZƏRTAC

Azərbaycan Prezidenti İlham Əliyevin penitensiar sahədə fəaliyyətin təkmilləşdirilməsi ilə bağlı tapşırıqlarına uyğun olaraq məhkumların və təqsirləndirilən şəxslərin tibbi və dərman təminatı yaxşılaşdırılır. Bu sahədə beynəlxalq təşkilatlarla vərəmə qarşı səmərəli mübarizə aparılaraq, müsbət nəticələrə nail olunub və artıq bir çox dövlətlər Azərbaycan təcrübəsindən faydalanırlar.

Ədliyyə Nazirliyinin mətbuat xidmətindən AZƏRTAC-a bildiriblər ki, bu məqsədlə Ədliyyə Nazirliyi İxtisaslaşdırılmış Müalicə Müəssisəsinin nəzdində fəaliyyət göstərən Təlim Mərkəzi tərəfindən xarici dövlətlərin nümayəndə heyətləri üçün mütəmadi beynəlxalq treninqlər və tanışlıq səfərləri təşkil edilir. 2014-cü ildə Ümumdünya Səhiyyə Təşkilatının (ÜST) Avropa Regional Bürosu tərəfindən ona “Həbsxanalarda vərəmə nəzarət və profilaktika üzrə ÜST ilə Əməkdaşlıq Mərkəzi” beynəlxalq statusu verilib və onun vərəmlə mübarizədə Azərbaycan təcrübəsinin digər dövlətlərə yayılmasında və öyrənilməsində səmərəli fəaliyyəti nəzərə alınaraq cari ildə bu status növbəti dörd il müddətinə uzadılıb.

Həmçinin Ümumdünya Səhiyyə Təşkilatının baş direktoru Dr. Tedros Adhanom Qebreyesus bu ilin iyulunda Azərbaycana səfər edərək Beynəlxalq Təlim Mərkəzinin fəaliyyəti, müasir şəraiti, tədris otaqları, həmçinin videokonfrans vasitəsilə distant treninqin təşkili ilə tanış olub, respublikamızın vərəmlə mübarizədə müsbət nəticələrə nail olunmasında dövlətimizin güclü siyasi iradəsini, bu sahədə Azərbaycanın tətbiq etdiyi standartların ən yaxşı təcrübə təşkil etdiyini və bunun üçün müsbət təcrübəmizin dünyada daha geniş yayılmasının önəmini vurğulayıb.

Qeyd olunmalıdır ki, son illər 20 dövlətdən 230-dək nümayəndə Bakıya səfərlər edərək müsbət təcrübəmizdən bəhrələnib və müxtəlif mövzularda təlimlərdə iştirak ediblər. Artıq bəzi ölkələrdə Azərbaycanın təcrübəsinə uyğun modellərin tətbiqinə başlanılıb.

Ümumdünya Səhiyyə Təşkilatının Özbəkistan üzrə ofisinin respublikamızın Ədliyyə Nazirliyinə müraciətinə əsasən bu ölkənin Daxili İşlər Nazirliyi Cəzaların İcrası Baş İdarəsinin, penitensiar müəssisələrinin, Səhiyyə Nazirliyinin vərəməleyhinə tibb müəssisələrinin mütəxəssislərindən, eləcə də həmin Ofisin təmsilçisindən ibarət geniş nümayəndə heyəti bu günlərdə Azərbaycanda təcrübə səfərində olub.

Səfər zamanı Ədliyyə Nazirliyinin Tibb baş idarəsi və Beynəlxalq Təlim Mərkəzi tərəfindən nümayəndə heyəti üçün vərəmə nəzarət proqramı barədə geniş təqdimatlar keçirilib, həmçinin Azərbaycanın penitensiar müəssisələrində bu sahədə ölkəmizin təcrübəsi ilə tanışlıq imkanı yaradılıb.

Bakı istintaq təcridxanasına, 9 saylı cəzaçəkmə və ixtisaslaşmış müalicə müəssisələrinə başçəkmələr zamanı vərəmə nəzarət üzrə görülən işlər, o cümlədən məhbuslar arasında vərəmin aşkarlanması, innovativ texnologiyaların tətbiqi ilə laborator diaqnostika, infeksiyaya nəzarət tədbirlərinə riayət edilməklə mərkəzləşdirilmiş model əsasında müalicə üzrə bir sıra müəssisələrdə həyata keçirilən tədbirlər praktiki olaraq nümayiş etdirilib.

Həmçinin qonaqlara dərmanlara həssaslıq göstəricilərinə müvafiq olaraq müalicə rejimlərinin təyini, məhbusların saxlanma rejiminin gözlənilməsi şərti ilə infeksiyaya nəzarət tədbirlərinə riayət edilməsi, azadlığa buraxılan xəstələrin müalicəsinin sonadək izlənilməsi və onlara sosial dəstək kimi Azərbaycanın unikal təcrübəsi təqdim olunub.

Səfər çərçivəsində Özbəkistan nümayəndə heyəti paytaxtın mədəni-tarixi abidələri ilə tanış olub, onlara son illər ərzində ölkəmizin davamlı inkişafı, habelə Ermənistan-Azərbaycan Dağlıq Qarabağ münaqişəsinin acı həqiqətləri barədə dolğun məlumatlar verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.